Lúther sagður í haldi vegna kókaín­smygls

Rúv segir heimildir sínar herma að Lúther Ólason sé meðal þeirra níu sem handteknir voru vegna rannsóknar á innflutningi á 106 kílógrömmum af kókaíni sem komu til landsins með álflutningaskipi í Straumsvík 22. júní. 

Þrír íslenskir ríkisborgarar eru í varðhaldi vegna málsins og sex erlendir ríkisborgarar, að sögn lögreglu.

Sjá einnig: Straumsvíkurmálið

Greint var frá því á miðvikudag að Lárus Freyr Einarsson, sem sakfelldur hefur verið fyrir morð í Danmörku, væri meðal þeirra sem handteknir voru.

Lúther var árið 2024 dæmdur í tólf mánaða skilorðsbundið fangelsi í Héraðsdómi Reykjavíkur fyrir meiriháttar skattalagabrot. Hann hafði staðið skil á röngum skattframtölum og -skýrslum fyrir félagið sitt, Stapafell ehf. Honum var einnig gert að greiða 55 milljóna króna sekt en Landsréttur mildaði sektina niður í 51 milljón. 

Lögreglan metur virði kókaínsendingarinnar, sem er sögð hafa verið falin í sjóbúri skipsins Koznitza, upp á hátt í þrjá milljarða króna og því ljóst að ekki sé um neina smápeninga að ræða.