„Ekki viss hvort ég sé að skrifa minningar­grein eða kveðju­bréf“

„Annars ætla ég að halda mig við minningarkveðju því ég hef engan áhuga á því að ganga frá þessu ævintýri með neikvæðum hætti og hugsunum,“ skrifar Árni Már í færslunni sem hann birti á síðu Stúdíós Árna Más í gær. 

„Gallery Port er eitthvað sem átti aldrei að verða að veruleika, aldrei að fæðast og aldrei að verða að þessu fjalli af reynslu, stemningu, góðum vináttusamböndum og einni stórri veislu, okkur var lofað að kofinn yrði rifinn nokkrum mánuðum seinna, en þó við kveðjum hann þá er svo sannarlega ekki svo að við Skarpi séum að kveðja þó ein taug sem tengir okkur saman sé slitin,“ segir hann og vísar þar til Skarphéðins Bergþórusonar, meðstofnanda síns.

„Saman höfum við veitt hvort öðrum misgóða liðveislu, misgóða gagnrýni og misgóð ævintýri en saman höfum við gert það sem Goddur lýsti svo vel, náð að halda okkur saman í miðjunni. Einn við það að poppa í örlyndi og hinn að slaka niður í kjarna jarðar. Annars er aldrei hægt að taka okkar besta dreng Þorvald Jónsson út fyrir sviga, þarf að kveðja sökum anna og annara ævintýra en mætti við minnsta tilefni með auka verkfæri, annan sandpappír og þetta geggjaða gips sem virkar miklu betur en þetta flügger spartl.“

Árni, Skarphéðinn og Þorvaldur stofnuðu Gallerý Port þann 26. mars 2016 á Laugavegi 23b. Þorvaldur fór úr hópnum til að sinna öðrum verkefnum en hinir tveir héldu ótrauðir áfram og árið 2024 flutti Gallery Port yfir á Hallgerðargötu 19-23 á Kirkjusandi.

Varð að marktækum listamanni

„Þetta er búið að vera svo ævintýralega gott glens að ég mun aldrei koma því í orð og ekki nenni ég að hitti ykkur öll til þess að reyna að koma ykkur í skilning um hvað maðurinn sem opnar dyrnar 26. mars 2016 var og maðurinn sem fer fljótlega að skella í lás eftir þennan 26. mars 2026 er,“ skrifar Árni.

„Á þessum tíma varð ég allt í einu að marktækum listamanni, ráðlagði stórum og litlum, háum og smáum, mörgum og fáum, með hvaða verk væri best að velja, hvaða listamann væri vert að veðja á og hver þeirra hentaði ekki fyrir þetta tilefni eða annað. Sögurnar, minningarnar, löngu næturnar og stundum ekkert sofið án nokkurra misólöglegra bætiefna nema koffín í annari og einhverjar þrjár týpur af nikótíni í hinni. Þessu verður komið í bók 26. mars 2031 í fyrsta lagi en bíðið spennt.“

Þá tekur hann fram að hann muni aldrei einu sinni ýja að því að hann gæti gert þetta allt saman sjálfur.

„Bæði ferill minn og líf er byggður á því að ég á af einhverjum ástæðum her af fólki og velviljuðum einstaklingum, mismiklum ógæfumönnum og annars prýðisfólki sem eru tilbúin að ganga með mér í gegnum eldinn, moka með mér skaflinn og lakka helvítis skiltið korter í opnun. Þið vitið hver þið eruð og því miður þá koma fleiri skilti sem þarf að lakka, aðrar marmaraplötur sem þarf að bera og verkefni sem ég ræð ekki við án ykkar,“ skrifar Árni.

„En fram að því þá ætla ég að einsetja mér það að út þetta ár verður ekki stofnað til frekari vandræða nema þeirra sem tengjast minni vinnustofu eða á einn eða annan hátt tengjast minni listsköpun. Ég er ekki viss um að ég mun standa við þetta loforð en gerum okkar besta. Fram að því þá sjáumst við í þurrgufunni, skálum á stúkunni, förum á bókasafnið og höngum og glensum.“

„Að öllu óbreyttu þá verður Kirkjusandi lokað“

Blaðamaður heyrði hljóðið í Árna í tilefni af fregnunum, ekki síst til að forvitnast um nákvæma stöðu Gallerýs Ports sem er nokkuð loðin í færslunni. Ástæðan fyrir þessari óvissu að sögn Árna er sú að enn standa yfir viðræður um framtíð Gallerýs Ports.

„Að öllu óbreyttu þá verður Kirkjusandi lokað. Þeir sem við erum í viðræðum við, þeir vilja kaupa fasteign annars staðar og þess vegna erum við í viðræðum. En ef ekkert gengur þá pökkum við saman í skjalatösku og setjum það niður í geymslu,“ segir Árni í samtali við fréttastofu.

Hvað kemur til að þú vilt hætta þessu núna?

„Vinnustofan mín og mín verk hafa ekki gert annað en að stækka í framkvæmd og sölu og fleira. Annað verkefni sem ég fór af stað með síðasta sumar, listamannarekni fjárfestingarsjóðurinn Afland, tekur líka mikið pláss,“ segir Árni.

Árni hefur því sinnt gallerýinu, eigin vinnustofu og fjárfestingarsjóðnum samhliða því að ala upp þriggja ára barn sitt. 

„Það þurfti eitthvað að flakka,“ segir Árni og bætir við: „Það er búið að vera erfiður rekstrargrundvöllur fyrir listagallerý í öllum heiminum og gallerý um allar jarðir að loka. Þannig við mátum stöðuna með okkar ráðgjöfum og fagfólki og ákváðum að við myndum stíga út úr þessu.“

„Síðustu tíu árin hafa verið alveg klikkuð, við höfum verið með á annað þriðja hundrað sýninga og fullt af viðburðum,“ segir Árni um starfsemi gallerýsins síðustu tíu árin.

„Þetta hefur verið alls konar samsuða af menningu og þá helst með þessari grasrót. Það verður smá tómlegt á næstu misserum að vera ekki alltaf með Gallerý Port og starfsemi þess í hausnum á sér,“ segir hann að lokum.