Hvað þarf Chiesa eigin­lega að gera til að fá fleiri mínútur hjá Liverpool?

Chiesa hefur átt nokkrar eftirminnilegar endurkomur á tímabilinu en þrátt fyrir það fær hann lítil sem engin tækifæri með liðinu og kemur helst við sögu þegar allt er komið í óefni.

Í jafnteflinu á móti Sunderland í vikunni spretti Chiesea alla leið aftur í vörnina þegar framherji Sunderland slapp einn í gegn.

Sunderland-maðurinn Wilson Isidor sólaði Alisson í markinu en Chiesea tókst að bjarga á marklínu og bjarga því að Sunderland vann ekki á Anfield.

Chiesea hefur aðeins spilað samtals í 139 mínútur í ensku úrvalsdeildinni á leiktíðinni og hefur gert margt gott.

Hann skoraði sigurmarkið á móti Bournemuth, jöfnunarmark á móti Crystal Palace, lagði upp jöfnunarmark á móti Manchester United og bjargaði síðan stiginu á móti Sunderland.

Chiesea hefur komið með beinum hætti að þremur mörkum á þessum 139 mínútum (2 mörk + 1 stoðsending) eða marki á 46 mínútna fresti.

Mohamed Salah hefur komið að marki á 187 mínútna fresti, Cody Gakpo hefur komið að marki á 150 mínútna fresti og Hugo Ekitiké hefur komið að marki á 177 mínútna fresti svo einhverjir séu nefndir. Alexander Isak hefur komið að tveimur mörkum á 475 mínútum og Florian Wirtz hefur komið að einu marki á 858 mínútum.

Það er því ekkert skrýtið að menn spyrji: Hvað þarf Chiesa eiginlega að gera til að fá fleiri mínútur hjá Liverpool?