Dreymir enn um Evrópu: „Ekki til­búin að borga það sama“

Einhver lið á Norðurlöndunum voru áhugasöm um Dag þegar ljóst var að hann væri á förum frá Flórída. Þau hafi hins vegar ekki getað boðið sömu laun og vestanhafs.

„Það komu upp nokkrir klúbbar í Skandinavíu. Ef ég á að vera alveg hreinskilinn voru þau ekki tilbúin að borga það sama og í MLS. Það var eiginlega meginástæðan,“ segir Dagur Dan um áhuga frá Evrópu.

Hann stefnir einn daginn aftur austur um haf til Evrópu og langar að spila í einhverjum af stærstu deildum álfunnar. Hann sér fyrir sér að Ítalía geti kallað ef vel gengur í Kanada.

„Eigendur Montreal eru eigendur Genoa líka, það gæti verið gluggi í því að komast til Evrópu ef ég á draumatímabil. Það er spennandi,“ segir Dagur Dan.

„Ég sagði við konuna að við gæfum þessu fimm ár. Ef ég næ því ekki á næstu fimm árum tæki maður kannski Sádí eða eitthvað svoleiðis, ef það myndi standa til boða,“

„Draumurinn er að spila í topp fimm deild og draumur allra að spila á Englandi. En Ítalía eða Þýskaland – ég færi ekki að gráta ef það myndi gerast. Gefum þessu fimm ár og sjáum hvað gerist,“ segir hinn 25 ára gamli Dagur Dan.

Fleira kemur fram í viðtali við Dag sem sjá má í spilaranum að neðan.