Á­nægja með gjaldfrjálsar skólamáltíðir en fjármögnunin á­skorun

Þetta kemur fram í nýrri skýrslu um áhrif af gjaldfrjálsum skólamáltíðum, sem birt hefur verið á heimasíðu Stjórnarráðsins. Skýrslan var kynnt á ríkisstjórnarfundi í morgun.

Skýrslan var unnin af starfshópi skipuðum af innviðaráðherra og byggir meðal annars á þremur könnunum sem lagðar voru fyrir sveitarfélögin, stjórnendur grunnskóla og foreldra og forráðamenn.

Samkvæmt skýrslunni segjast skólastjórnendur og sveitarfélögin sjá mikinn ávinning af gjaldfrjálsum skólamáltíðum, þar sem öllum börnum séu tryggðar skólamáltíðir óháð efnahag og fleiri börn nýti máltíðirnar.

Áskoranir vegna verkefnisins felast meðal annars í matarsóun og fjármögnun en kostnaður hefur aukist hjá meirihluta sveitarfélaga, meðal annars vegna þess að mótframlag ríkisins nemur einungis hluta af heildarkostnaði og verð á matvöru fer hækkandi.

Starfshópurinn beinir sex ábendingum til stjórnvalda, ríkis og sveitarfélaga:

• Rannsaka þarf matarsóun og gera íhlutanir til að minnka hana.
• Hafa þarf eftirlit með gæðum máltíða og næringarinnihaldi.
• Tryggja þarf fjármagn fyrir gæðaríkri skólamáltíð.
• Tryggja þarf að til staðar séu upplýsingar sveitarfélaga um raunkostnað.
• Skýra þarf hvort gjaldfrjálsar skólamáltíðir eigi eingöngu við um hádegisverð eða alla málsverði á skólatíma.
• Taka þarf ákvörðun um framhald verkefnisins þegar því lýkur árið 2027.