Innlent

Olían í bræðslunum þurrkaði upp á­vinning rafbílavæðingar

Kristján Már Unnarsson skrifar
Magnús B. Jóhannesson, framkvæmdastjóri Storm Orku, í viðtali fyrir fréttir Stöðvar 2.
Magnús B. Jóhannesson, framkvæmdastjóri Storm Orku, í viðtali fyrir fréttir Stöðvar 2. Arnar Halldórsson

Þriðja veturinn í röð neyðast fiskimjölsverksmiðjur landsins til að brenna olíu vegna raforkuskort. Sú aukna olíunotkun sem af þessu leiddi síðastliðinn vetur þurrkaði upp allan loftslagsávinning af öllum innfluttum rafmagnsbílum frá upphafi.

Fjallað var um málið í fréttum Stöðvar 2. Erfiður vatnsbúskapar og aukin raforkunotkun stórfyrirtækja, heimila og smærri fyrirtækja segir Landsvirkjun valda því að fyrirtæki eins og fiskimjölsbræðslur og gagnaver þurfa nú að sæta skerðingu, sem sögð er geta staðið fram á vor.

Frá Norðfirði. Séð yfir fiskimjölsverksmiðju Síldarvinnslunnar.Einar Árnason

„Þetta er sláandi. Það verður bara að segjast,“ segir Magnús B. Jóhannesson, framkvæmdastjóri Storm Orku.

„Við höfum öll tækifæri til þess að gera Ísland grænt þegar kemur að orkuöflun, algjörlega grænt. Farið í hundrað prósent orkuskipti eða því sem næst. En því miður erum við ekki að nýta okkur þessi tækifæri.“

Sjálfur stýrir Magnús fyrirtækinu Storm Orku sem í áraraðir hefur árangurslaust reynt að þoka leyfisumsókn vegna vindorkuvers í gegnum kerfið.

„Það er auðveldara að fá leyfi fyrir dísilrafstöð. Það tók tvö ár að fá leyfi fyrir varaaflsdísilrafstöð Landsnets sem er ellefu megavött. En græn orka, það tekur ár eða áratugi að fá leyfi fyrir slíku verkefni.“

Magnús vitnar í nýja útreikninga Eflu fyrir Landsnet um að þjóðhagslegur kostnaður vegna raforkuskerðingar til fiskimjölsverksmiða hafi numið fimm milljörðum króna á einum vetri.

Frá Vopnafirði. Þar rekur Brim fiskimjölsverksmiðju.Skjáskot/Stöð 2

„Ef þetta eru tveir vetur þá eru þetta líklega tíu milljarðar, ef þetta eru þrír vetur, þá eru það fimmtán, ef við erum að tala um sambærilegar tölur fyrir hvern vetur:“

Landsmenn hafa undanfarin misseri kappkostað að kaupa sér rafmagnsbíla. Loftslagsávinningurinn sem af þessu hlýst, hann hefur hins vegar þurrkast upp. Dísilolíunotkun fiskimjölsverksmiðja í stað rafmagns á einum vetri sá til þess, að sögn Magnúsar.

„Þurrkaði út allan loftslagsávinning af öllum innfluttum rafmagnsbílum frá upphafi. Sem voru fluttir inn með ívilnunum frá ríkissjóði. Þannig að samfélagslegur kostnaður er verulegur.“

Magnús nefnir að Aðalheiður Jóhannsdóttir, prófessor við Háskóla Íslands, hafi bent á að huga mætti að því að leggja rammaáætlun niður, eins og Norðmenn hafi gert, og taka upp einfaldara leyfisveitingaferli. Hafa kerfið þannig að það tæki eitt ár og að það þyrfti eitt leyfi, en ekki að sækja þyrfti um leyfi frá mörgum aðilum.

Orkuveita Reykjavíkur og Sveitarfélagið Ölfus ákváðu í dag að sækja sameiginlega um rannsóknarleyfi vegna jarðhitavirkjunar ofan Hveragerðis. Frá vinstri: Hera Grímsdóttir, framkvæmdastýra rannsókna og nýsköpunar OR, Guðlaugur Þór Þórðarson umhverfis-, orku- og loftslagsráðherra, Elliði Vignisson, bæjarstjóri í Ölfusi, og Sævar Freyr Þráinsson, forstjóri OR.Einar Örn Jónsson

Jarðhitavirkjun í Ölfusdal ofan Hveragerðis eru nýjustu áformin um græna orkuöflun en ráðamenn Orkuveitu Reykjavíkur og Sveitarfélagsins Ölfuss ákváðu í dag að viðstöddum umhverfisráðherra að sækja sameiginlega um rannsóknarleyfi. Miðað við ferli rammaáætlunar gæti orðið löng bið.

„Meðaltími verkefnisstjórnar á að afgreiða verkefni þaðan voru sextán ár. Ýktustu dæmin voru að það tók 23 ár að afgreiða eitt verkefni í gegnum rammaáætlun. Og síðan á eftir að byggja verkefnin.

Þannig að það sér það hver maður að þetta reikningsdæmi getur aldrei gengið upp,“ segir Magnús B. Jóhannesson, framkvæmdastjóri Storm Orku.

Hér má sjá frétt Stöðvar 2:

Orkumál Loftslagsmál Landsvirkjun Sjávarútvegur Umhverfismál Vistvænir bílar Bensín og olía Vatnsaflsvirkjanir Vindorka Jarðhiti Ríkisstjórn Katrínar Jakobsdóttur

Tengdar fréttir

Skerða orku til fiskverkunar og gagnavera

Landsvirkjun hefur tekið ákvörðun um að skerða orku til fiskimjölsverksmiðja, fiskþurrkana og gagnavera sem stunda rafmyntagröft. Þetta kemur fram í tilkynningu, þar segir að afhending á víkjandi orku verði stöðvuð frá og með 1. desember og verði í gildi þar til miðlunarstaða hafi batnað.

Gætum neyðst til að kaupa loftslagskvóta fyrir milljarða

Guðlaugur Þór Þórðarson, umhverfis-, orku- og loftslagsráðherra, segir að ef Íslendingar standi ekki við alþjóðlegar skuldbindingar sínar í loftslagsmálum fyrir árið 2030 gætu þeir neyðst til að kaupa loftslagsheimildir fyrir einn til tíu milljarða króna á ári. Þetta kom fram í ávarpi ráðherrans á haustfundi Landsvirkjunar í morgun.

Orku­skortur kom þungt niður á kol­efnis­bók­haldi Síldar­vinnslunnar

Ef fiskimjölsverksmiðjur Síldarvinnslunnar á Neskaupstað hefðu haft ótakmarkað aðgengi að rafmagni hefði verið hægt að koma í veg fyrir losun 14 þúsund tonna af kolefnisígildum á síðasta ári. Forstjóri Síldarvinnslunnar segir vonbrigði að orkubúskapur landsins sé ekki í betri stöðu en raun ber vitni.

Bræðslur keyrðar á olíu vegna raforkuskerðingar

Annan veturinn í röð hafa fiskimjölsverksmiðjur neyðst til að brenna dísilolíu vegna raforkuskerðingar. Landsvirkjun segir þetta vegna mikils álags, kerfið sé nánast uppselt.

Elliðaárstöð stendur ónotuð á tíma raforkuskorts í landinu

Á sama tíma og kvartað er undan raforkuskorti í landinu vekur athygli að heil virkjun skuli standa ónotuð og það innan borgarmarka Reykjavíkur. Þetta er Elliðaárstöðin en forstjóri Orkuveitu Reykjavíkur sagði fyrir ári að engin þörf væri á meiri orku.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið