Gætum neyðst til að kaupa loftslagskvóta fyrir milljarða

Kristján Már Unnarsson skrifar 11. október 2023 12:21

Guðlaugur Þór Þórðarson, umhverfis-, orku- og loftslagsráðherra, á haustfundi Landsvirkjunar í morgun. Landsvirkjun

Guðlaugur Þór Þórðarson, umhverfis-, orku- og loftslagsráðherra, segir að ef Íslendingar standi ekki við alþjóðlegar skuldbindingar sínar í loftslagsmálum fyrir árið 2030 gætu þeir neyðst til að kaupa loftslagsheimildir fyrir einn til tíu milljarða króna á ári. Þetta kom fram í ávarpi ráðherrans á haustfundi Landsvirkjunar í morgun.

Fjallað var um málið í hádegisfréttum Bylgjunnar. Guðlaugur Þór rakti að Íslendingum hefði frá árinu 2005, viðmiðunarári Kyoto-bókunarinnar, tekist að draga úr losun um tólf prósent. Miðað við nýjustu sviðsmyndir stefndi í að Íslendingar næðu samdrætti upp á 26 prósent.

„En við þurfum að ná 40 prósent fyrir árið 2030. Og 2030 er á morgun,“ sagði ráðherrann. Og rifjaði upp að Íslendingar hefðu nýlega neyðst að kaupa loftslagsheimildir fyrir 250 milljónir króna þar sem ekki var staðið við skuldbindingar um landgræðslu og skógrækt.

„Og ef við náum ekki markmiðunum árið 2030 þá er kostnaðurinn, miðað við þær forsendur sem eru núna, svona einn milljarður til tíu milljarðar á ári. Ekki eingreiðsla sem var í uppgjörinu varðandi Kyoto.

En ef við náum hins vegar markmiðunum þá seljum við loftslagsheimildir og höfum tekjur af því, eins og við höfum haft á undanförnum árum,“ sagði Guðlaugur Þór.

Haustfundur Landsvirkjunar fór fram á Hilton Reykjavík Nordica-hótelinu. Landsvirkjun

Hann nefndi fiskimjölsverksmiðjur, húshitun og bíla sem dæmi um aukna losun milli ára vegna aukinnar notkunar jarðefnaeldsneytis þar sem skort hefði græna orku. Hann sagði loftslagsmálin snúast um að afla grænnar orku í stað jarðefnaeldsneytis.

„Á undanförnum fimmtán árum hefur verið algjör stöðnun í framleiðslu á grænni orku á Íslandi. Það hefur bara verið stöðnunartímabil.

Við höfum á þessum miklu uppbyggingartímum á Íslandi að meðaltali verið að auka uppsett afl um 24 megavött á ári. Þess vegna erum við að horfa á þessi vandræði sem við erum að horfa á í dag. Vegna þess að þetta snýst um það að okkur vantar græna orku. Það er ekkert flóknara en það,“ sagði Guðlaugur Þór Þórðarson, umhverfis-, orku- og loftslagsráðherra, á haustfundi Landsvirkjunar.

Landsvirkjun Orkuskipti Orkumál Umhverfismál Loftslagsmál

Tengdar fréttir

Telja markmið um orkuskipti ekki munu nást fyrr en áratug seinna

Samkvæmt nýrri raforkuspá Landsnets sem kynnt verður í dag munu markmið stjórnvalda um orkuskipti ekki nást árið 2040 eins og stefnt var að, heldur árið 2050.

24. ágúst 2023 08:34

Bræðslur keyrðar á olíu vegna raforkuskerðingar

Annan veturinn í röð hafa fiskimjölsverksmiðjur neyðst til að brenna dísilolíu vegna raforkuskerðingar. Landsvirkjun segir þetta vegna mikils álags, kerfið sé nánast uppselt.

11. febrúar 2023 22:00

Segir taka mánuði að skoða nýtt virkjunarleyfi í Þjórsá

Orkustofnun og Umhverfisstofnun vinna núna að því að bæta úr þeim ágöllum sem urðu til þess að virkjunarleyfi Hvammsvirkjunar í Þjórsá var fellt úr gildi. Forstjóri Umhverfisstofnunar segir skipta miklu máli að vanda til verka.

3. júlí 2023 22:11

Forstjóri Landsvirkjunar segir stefna í erfiðan raforkuskort

Forstjóri Landsvirkjunar segir stefna í erfiðan raforkuskort á næstu árum ef ekki verður losað um þau virkjanaáform sem sitja föst í kerfinu. Hann skorar á sveitarfélög að blanda ekki lögbundinni skipulagsskyldu inn í ágreining við ríkið um tekjustofna.

29. júní 2023 21:48

Orkuveitan velur skemmtigarð og kaffihús fram yfir raforkuvinnslu

Orkuveita Reykjavíkur er að byggja fjölskyldu- og skemmtigarð ásamt kaffihúsi við Elliðaárstöð á sama tíma og hún telur ekki svara kostnaði að hefja þar raforkuframleiðslu á ný. Forstjóri Orkuveitunnar neitar að svara spurningum um málið en oddviti sjálfstæðismanna í borginni segir enga spurningu að endurskoða eigi lokun rafstöðvarinnar.

2. maí 2022 21:45

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.