Innlent

Segir taka mánuði að skoða nýtt virkjunarleyfi í Þjórsá

Kristján Már Unnarsson skrifar
Fyrirhugað er að Þjórsá verði stífluð á móts við bæinn Hvamm undir Skarðsfjalli í Landsveit.
Fyrirhugað er að Þjórsá verði stífluð á móts við bæinn Hvamm undir Skarðsfjalli í Landsveit. Landsvirkjun

Orkustofnun og Umhverfisstofnun vinna núna að því að bæta úr þeim ágöllum sem urðu til þess að virkjunarleyfi Hvammsvirkjunar í Þjórsá var fellt úr gildi. Forstjóri Umhverfisstofnunar segir skipta miklu máli að vanda til verka.

Sama dag og úrskurðarnefnd umhverfis- og auðlindamála felldi virkjunarleyfi vegna Hvammsvirkjunar úr gildi þann 15. júní sagði umhverfis- og orkumálaráðherra að strax yrði farið í það að kanna hvað fór úrskeiðis og það mætti ekki taka langan tíma.

„Við höfum legið yfir þessu, já, með Orkustofnun og fundað þétt síðan. Og við hyggjumst áfram vinna með Orkustofnun að úrlausn þessa máls,“ segir Sigrún Ágústsdóttir, forstjóri Umhverfisstofnunar, í samtali við Stöð 2.

Sigrún Ágústsdóttir er forstjóri Umhverfisstofnunar.Einar Árnason

„Það þarf sem sagt að taka tvær ákvarðanir; eina á grundvelli raforkumála og síðan eina á grundvelli stjórnar vatnamála.“

En hve langan tíma tekur þetta?

„Við erum að hugsa þetta í mánuðum núna. En það er mjög erfitt að gefa alveg nákvæma tímalínu af því við erum með fyrsta mál þessarar tegundar eftir að þessi úrskurður fellur og líka fyrsta mál þessarar tegundar varðandi stjórn vatnamála,“ svarar Sigrún.

Forstjóri Landsvirkjunar sagði í síðustu viku að í raun hefði bara skort á samtal milli þessara tveggja stofnana. Er forstjóri Umhverfisstofnunar sammála því mati?

„Ja, það eru skilaboð úrskurðarnefndarinnar, einmitt. Að þarna hefði málsmeðferðin þurft að tvinna inn sem sagt vinnu Umhverfisstofnunar og ábendingar sem lítur að þessari löggjöf, já.“

Frá fyrirhuguðu lónstæði Hvammsvirkjunar neðan við bæinn Haga.KMU

Sigrún segir lög um stjórn vatnamála mjög þýðingarmikil enda sé vatn mikið hreyfiafl.

„Vatn hefur mikil áhrif á lífríkið og jarðefnin og líka landslagið þar sem vatnið rennur. Og þetta er auðvitað heilmikið inngrip að setja upp stíflur og annað slíkt. Þessvegna þurfum við að taka það að mjög yfirlögðu ráði.. - við höfum ofsalega góð gögn – þegar við tökum þessar ákvarðanir.“

En kannski er stærsta spurningin sú: Verður yfirhöfuð hægt að fá nýtt virkjunarleyfi eða er leiðin lokuð?

„Ég ætla ekki að taka ákvörðun í beinni. Það geri ég ekki. En við skulum bara sjá hverju fram vindur. Við lofum því að vanda okkur,“ svarar forstjóri Umhverfisstofnunar.

Hér má sjá frétt Stöðvar 2:

Deilur um Hvammsvirkjun Umhverfismál Orkumál Landsvirkjun Skipulag Skeiða- og Gnúpverjahreppur Rangárþing ytra Orkuskipti

Tengdar fréttir

Forstjóri Landsvirkjunar segir stefna í erfiðan raforkuskort

Forstjóri Landsvirkjunar segir stefna í erfiðan raforkuskort á næstu árum ef ekki verður losað um þau virkjanaáform sem sitja föst í kerfinu. Hann skorar á sveitarfélög að blanda ekki lögbundinni skipulagsskyldu inn í ágreining við ríkið um tekjustofna.

Segir að einfalt ætti að vera að fá heimild fyrir Hvammsvirkjun

Forstjóri Landsvirkjunar segir að það ætti að vera tiltölulega einfalt mál að fá aftur virkjunarleyfi fyrir Hvammsvirkjun, aðeins hafi vantað samtal milli tveggja ríkisstofnana. Hann gagnrýnir úrskurðarnefnd fyrir að fella leyfið úr gildi og koma þannig í veg fyrir að mikilvægar framkvæmdir hefjist í sumar.

Umhverfisráðherra segir Íslendinga ekki geta beðið eftir grænni orku

Umhverfis- og orkumálaráðherra segir útilokað að bíða með öflun grænnar orku á Íslandi ef Íslendingar ætli að ná markmiðum sínum í loftslagsmálum. Nú verði kannað hvað fór úrskeiðis við virkjanaleyfi Hvammsvirkjunar og það megi ekki taka langan tíma. Laga þurfi umsóknarferli vegna virkjana án þess að gefa eftir í umhverfismálum.

Talsmaður laxaverndar fagnar og vonar að virkjunin sé úr sögunni

Virkjunaráform í neðri Þjórsá eru í algerri óvissu eftir að úrskurðarnefnd umhverfis og auðlindamála felldi virkjunarleyfi Hvammsvirkjunar úr gildi í dag, aðeins sólarhring eftir að sveitarstjórn Skeiða- og Gnúpverjahrepps samþykkti framkvæmdaleyfi.

Mest lesið


Fleiri fréttir

Sjá meira


×

Mest lesið