Lífið

Flottur harmoníkuleikari úr Skagafirði

Magnús Hlynur Hreiðarsson skrifar
Jón Þorsteinn með nikkuna sína heima á Akureyri en hann er úr Skagafirði. Hann er í hópi bestu harmonikkuleikara landsins og þó víðar væri leitað.
Jón Þorsteinn með nikkuna sína heima á Akureyri en hann er úr Skagafirði. Hann er í hópi bestu harmonikkuleikara landsins og þó víðar væri leitað. Magnús Hlynur Hreiðarsson

Einn efnilegasti og flottasti harmoníkuleikari landsins, Jón Þorsteinn Reynisson, sem er úr Skagafirði en býr á Akureyri hefur nú lokið framhaldsnámi við Konunglega danska tónlistarháskólann í Kaupmannahöfn í harmonikuleik. Hann spilar á takkaharmonikku.

Það fer vel um Jón Þorstein í bjartri og fallegri íbúð hans á Akureyri þar sem hann er með takka nikkuna sína, sem hann spilar reglulega á, á milli þess, sem hann er í girðingarvinnu á heimaslóðum sínum í Skagafirði. 

Hann hefur verið að spila á tónleikunum „Sunnanvindur“, eftirlætislög Örvars Kristjánssonar harmoníkuleikara heitins en slíkir tónleikar hafa verið m.a. haldnir í Salnum í Kópavogi og svo verða þeir endurfluttir  á Akureyri í haust.

„Ég byrjaði á píanóharmonikku og svo var ég að fara að taka próf. Þá þurfti ég að skipta um kerfi vinstra megin, bassa megin og ég ákvað þá bara að skipta báðum megin, þá er það melótíubassakerfið og þá er það í rauninni sama hérna megin, þannig að það var fínt að skipta bara um báðar hendur í einu,“ segir Jón Þorsteinn og hlær.

Jón Þorsteinn kennir á harmonikku í Tónlistarskóla Eyjafjarðar.

“Ég er með eitthvað á milli fimmtán og tuttugu nemendur á harmonikku. Þannig að það hefur verið orðið algjör sprengja,“ bætir Jón við.

Það er meira en nóg að gera hjá Jóni Þorsteini að kenna á harmonikku í Tónlistarskóla Eyjafjarðar.Magnús Hlynur Hreiðarsson

En hvernig sér Jón Þorsteinn næstu ár hjá sér í harmoniku leiknum?

„Vonandi bara áfram gaman. Það er búið að vera mjög gaman síðan ég flutti heim, ég var út í Kaupmannahöfn í námi og flutti svo hingað til Akureyrar og búin að kynnast fullt af flottu tónlistarfólki hér og það verður bara pottþétt áframhald á því samstarfi,“ segir Jón Þorsteinn.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.