Fréttir

Efasemdir á Seyðisfirði um gagnsemi Fjarðarheiðarganga

Kristján Már Unnarsson skrifar
Frá Seyðisfirði.
Frá Seyðisfirði. Vilhelm Gunnarsson

„Í boði er annar valkostur sem er fjárhagslega hagkvæmur, leysir algerlega einangrun Seyðisfjarðar og opnar samtímis láglendisveg um allt Mið-Austurland, eykur allt öryggi og opnar nýja möguleika í samskiptum.“

Þetta segir Sigurður Gunnarsson á Seyðisfirði í grein á fréttamiðlinum Austurfrétt þar sem hann lýsir efasemdum um jarðgöng undir Fjarðarheiði. Ekki aðeins vekur athygli að þessi sjónarmið koma frá íbúa á Seyðisfirði heldur frá manni sem hefur hagsmuni af ferðaþjónustu í bænum en Sigurður rekur fyrirtækið Lónsleiru, sem annast útleigu íbúðagistingar á Seyðisfirði.

„Göngin eiga að vera 13,5 km löng og stytta vegleiðina um 3 km. Það er enginn tímasparnaður og Heiðin er mjög falleg vegleið í flestum veðrum. Það fara því fáir í göngin ef færð er góð, sem er flesta daga ársins. Nema allir verði skyldaðir,“ segir Sigurður í grein sinni en hann er með próf í hagsögu og hagfræði frá Uppsalaháskóla og var sveitarstjóri á Fáskrúðsfirði á níunda áratugnum. Hann er einnig lærður járnsmiður og starfaði við borun jarðganga við Kárahnjúka á einum af risaborum Impregilo.

Séð niður í Seyðisfjörð af Fjarðarheiði.vísir/einar

Sigurður efast raunar um að raunverulegur vilji sé hjá stjórnvöldum að gera Fjarðarheiðargöng.

„Þau yrðu ein lengstu göng í Evrópu og eru aðeins valkostur vegfarenda í vondum veðrum,“ og segir viðbrögð stjórnvalda við gjaldþroti hugmyndarinnar að boða veggjald í öllum göngum.

„Seyðfirðingum var lofað Fjarðarheiðargöngum fyrir sameiningarkosningar þar sem nær skuldlaus Seyðisfjarðarbær sameinaðist gjaldþrota Egilsstöðum í þeirri vissu að þar með fengju þeir göngin sem þeir hafa barist fyrir í 50 ár. Nú sést að forsendur loforðsins eru frá upphafi rugl en sameiningin er staðreynd. Allt framkvæmdafé ríkisins og veggjöld í öllum göngum landsins þarf í tvo áratugi til að borga þessi einu göng sem stytta aksturstíma ekkert.“

Fyrirhugaður munni Fjarðarheiðarganga í Seyðisfirði.Vegagerðin

Sigurður segir annan valkost í boði. Hann sé fjárhagslega hagkvæmur, leysi algerlega einangrun Seyðisfjarðar og opni samtímis láglendisveg um allt Mið-Austurland.

„Valkosturinn er að fara um Mjóafjörð og þaðan innst í Eyvindarárdal á Héraði. Göngin yrðu 5,6 km + 9,0 km í stað 13,5 km undir Fjarðarheiði. Þetta yrðu mun ódýrari göng því alls konar viðbótar kröfur bætast við vegna lengdar Fjarðarheiðarganga. Það er ekkert grín að keyra 13,5 km í einum göngum.

Mjóafjarðarleiðin yrði álíka verkefni og Siglufjarðargöng. Hún lengir aðeins leiðina til Egilsstaða og styttir hana álíka í Fjarðabyggð. Rúsínan í pylsuendanum er að frá Mjóafirði er bara 6,6 kílómetra jarðgangaleið að Norðfjarðargöngum og þar með láglendisveg um allt Mið Austurland.

Ég tel að ef Seyðfirðingar samþykkja Mjóafjarðarleiðina þá muni hún strax fá samþykki. Hún er hagsmunamál allra Austfirðinga og hið hagkvæmasta mál,“ segir Sigurður Gunnarsson á Seyðisfirði.

Mjóafjarðarleiðin þýddi jafnframt að vetrareinangrun Mjófirðinga yrði rofin en þar er tvísýnt um byggð, eins og fram kom í frétt Stöðvar 2 og þættinum Um land allt fyrr á árinu:


Tengdar fréttir

Mikilvægt að hefja framkvæmdir á Fjarðarheiði eins fljótt og hægt er

Vonskuveður var víðast hvar á landinu í dag og töluvert um foktjón. Þá var úrhellir á Seyðisfirði og Fjarðarheiði var lokuð bróðurpart dags. Sveitarstjóri Múlaþings segir gríðarlega mikilvægt að hefja framkvæmdir á Fjarðarheiði eins fljótt og auðið er.

Vilja að þrenn jarðgöng eystra verði öll boðin út á sama tíma

Hringtenging á Austurlandi myndi gerbreyta samskiptum íbúa á svæðinu og gera það að einu þjónustu- og atvinnusóknarsvæði. Bæjarráð Fjarðabyggðar leggur áherslu á að þrenn göng verði boðin út samtímis til að tryggja framgang þeirra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.