Cold­play hættir að gefa út nýja tón­list 2025

BBC segir frá málinu en Martin verður í stóru útvarpsviðtali í sérstökum jólaþætti Jo Whiley sem spilað verður á fimmtudagskvöld.

„Síðasta almennilega plata okkar kemur út árið 2025 og ég held að eftir það munum við einungis fara í hljómleikaferðalög,“ segir Martin. „Mögulega einhver samstarfsverkefni en plötusafni Coldplay lýkur þá.“

Yfirlýsing Martin rímar ágætlega við fyrri orð hans sem hann lét falla í tengslum við útgáfu níundu plötu sveitarinnar, Music Of The Spheres, fyrr á árinu. Sagði hann þá að sveitin ætli sér að gefa út tólf plötur í heildina, það er þrjár til viðbótar. Í viðtalinu við Whiley greinir hann þá nánar frá tímasetningum hvað útgáfuna varðar.

Martin segir að hann sjái fyrir sér að sveitin muni eftir 2025 fara í hljómleikaferðalög og segist hann þar líta sérstaklega til Rolling Stones og þeirra ferðalaga.

„Það væri geggjað ef við gætum enn verið á hljómleikaferðalögum þegar við erum að nálgast níræðisaldurinn. Það væri æðislegt ef einhver myndi vilja mæta,“ segir Martin.