Hrækti á börn og lögreglumann

Hólmfríður Gísladóttir skrifar 19. október 2021 06:15

Maðurinn vildi ekki gefa upp nafn eða kennitölu og hrækti á lögreglumann. Vísir/Vilhelm

Lögreglan á höfuðborgarsvæðinu handtók mann í Laugardalnum um kvöldmatarleytið í gær. Tilkynning hafði borist um að maðurinn, sem var ölvaður, hefði verið að áreita börn og hrækja að þeim.

Þegar lögregla kom á vettvang vildi maðurinn ekki gefa upp nafn eða kennitölu og hrækti á lögreglumann. Var hann því handtekinn og vistaður í fangageymslu.

Um svipað leyti barst lögreglu tilkynning um líkamsárás í miðbænum. Þar sagði maður fjóra einstaklinga hafa ráðist á sig og meðal annars sparkað í höfuð sitt en hann hefði náð að hlaupa frá þeim. Maðurinn var í miklu uppnámi og með rispur á olnboga og mjöðm.

Málið er í rannsókn.

Lögregla hafði einnig afskipti af fólki á heimili í póstnúmerinu 108. Þar voru þrír handteknir grunaðir um vörslu fíkniefna og voru þeir vistaðir í fangageymslu vegna rannsóknarhagsmuna.

Þá barst lögreglu tilkynning í nótt um innbrot í lyfjaverslun í póstnúmerinu 105.

Eitt alvarlegt umferðarslys var tilkynnt í gærkvöldi. Þar hafði ökumanni fipast þegar hann var að aka fram úr annarri bifreið á Bláfjallavegi. Ók hann útaf veginum með tvo farþega í bílnum. Ökumaðurinn fann til eymsla í hendi og var annar farþeginn verkjaður í baki, höfði og olnboga.

Slösuðu voru fluttir á Landspítala til aðhlynningar en ökumaðurinn og annar farþeginn reyndust aðeins 17 ára og því samband haft við foreldra og barnavernd.

Lögreglumál Reykjavík Kópavogur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.