Vara neytendur „sterklega“ við því að neyta kræklings úr Hvalfirði

Hólmfríður Gísladóttir skrifar 18. október 2021 07:32

MAST mun láta vita þegar óhætt verður að leggja kræklinginn sér til munns.

Matvælastofnun varar við tínslu á kræklingi í Hvalfirði þar sem DSP þörungaeitur hefur greinst yfir viðmiðunarmörkum. Frá þessu er greint á heimasíðu MAST.

Þar segir að DSP þörungaeitur geti valdið kviðverkjum, niðurgangi, ógleði og uppköstum. Einkenni komi fram fljótlega eftir neyslu og líði hjá á nokkrum dögum.

„Fulltrúi Matvælastofnunar safnaði kræklingi 22. september s.l. við Fossá í Hvalfirði. Tilgangurinn var að kanna hvort almenningi sé óhætt að tína krækling í Hvalfirði. Niðurstöður mælinga leiddu í ljós að DSP þörungaeitur var 1150 mg/kg í kræklinginum og er það yfir viðmiðunarmörkum, sem eru 160 mg/kg,“ segir í tilkynningunni á vef MAST.

Neytendur eru sterklega varaðir við því að neyta kræklings úr firðinum eins og er; stofnunin muni áfram fylgjast með stöðu mála og láta vita þegar óhætt verður að leggja sér kræklinginn til munns.

Matvælaframleiðsla Neytendur Matur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.