„Menn áttu alveg skilið að fá að heyra það“

Kári var tæpur fyrir leikinn og missti af leik Íslands við Rúmeníu á fimmtudag vegna meiðsla. Hann er 38 ára gamall og segir skrokkinn ekki vera þann besta eftir leik.

„Hann er ekkert frábær, ég ætla ekki ljúga því. Völlurinn er líka extra þungur þessa dagana þannig að ég þarf eiginlega bara að sjá til á morgun hvernig mér líður.“

Ísland byrjaði leikinn ekki vel og lenti undir vegna marks eftir hornspyrnu snemma leiks. Þeir makedónsku bættu öðru marki við snemma í síðari hálfleik áður en Ísland kom til baka á lokakaflanum og jafnaði leikinn.

„Þetta leit ekki vel út á köflum og við sköpuðum sama sem ekki neitt fram á við. Mér fannst strákarnir sem komu inn á koma með nýtt líf og við byrjuðum að taka sénsa í varnarleiknum, sem þú vilt kannski ekki gera í stöðunni 0-0, en það borgaði sig. Við fórum í rauninni bara maður á mann sem er áhættusamt, sérstaklega gegn betri liðum,“ segir Kári um leikinn og bætir við:

„Við vorum engan veginn nógu þéttir og þeir fengu bara að spila á milli okkar að vild og héldu boltanum vel í fyrri hálfleik. Seinni hálfleikur var betri og það borgaði sig að taka þessa sénsa. Menn sjá að þetta eru bara smáatriði sem muna, að við skorum fleiri mörk en þeir í dag,“

„Þeir fá í rauninni fá engin dauðafæri, þetta er lélegt engu að síður. Við eigum aldrei að fá á okkur mark úr föstu leikatriði, bara aldrei, það er bara ekki í boði. Það er bara spurning um að hafa kveikt á sér og vera aggressívur,“

Ekki hægt að gera sömu kröfur

Íslenska liðinu tókst að koma til baka og segir Kári það vegna þess að smáatriðin hafi fallið með liðinu eftir hléið. Hann segir þá að minnka verði kröfurnar á liðið vegna breytinganna sem hafa orðið á leikmannahópnum.

„Smáatriðin duttu með okkur í seinni hálfleik og við endum á að koma ágætlega frá þessu. Auðvitað vill maður ekki vera að taka eitt stig hér, maður vill þrjú stigin, maður er orðinn vanur því en það kom aldrei til greina að tapa tveimur leikjum í röð á móti liðum sem eru í dag á svipuðum stað og við.“ segir Kári.

„Það verður líka aðeins að minnka kröfurnar, þetta alveg það sama. Það er verið að byggja upp nýtt lið og kröfurnar eru kannski ekki gerðar strax allavega, að vinna hvern einasta leik á heimavelli.“

Hann segir þrátt fyrir það að kröfurnar eigi að vera gerðar um betri frammistöðu en sýnd var framan af leik í dag.

„Hundrað prósent. Það er ekki boðlegt og ég held að það séu allir meðvitaðir um það. En það voru gerðar breytingar í hálfleik á skipulagi og þetta leit töluvert betur út. En engu að síður, bæði mörkin bara óásættanleg.“ segir Kári sem segir að menn hafi verið gríðarlega ósáttir í hálfleiknum.

„Það var mikill hiti í mönnum og það var alveg verðskuldað. Menn áttu alveg skilið að fá að heyra það, allir sem einn.“ segir Kári en viðtalið við hann má sjá að ofan.