Fótbolti

Kórdrengir, Selfyssingar og Vestri með heimasigra í Lengjudeildinni

Hjörtur Leó Guðjónsson skrifar
Tíu leikmenn Kórdrengja kláruðu góðan 2-0 sigur gegn Þórsurum í kvöld.
Tíu leikmenn Kórdrengja kláruðu góðan 2-0 sigur gegn Þórsurum í kvöld. Vísir/Hulda Margrét

Fimm leikir fara fram í Lengjudeild karla í dag og nú er þrem þeirra lokið. Tíu leikmenn Kórdrengja héldu út gegn Þór frá Akureyri og unnu 2-0. Selfyssingar eru að hrista af sér falldrauginn eftir 3-0 sigur gegn Aftureldingu og Vestri vann góðan 2-0 sigur gegn botnliði Víkinga frá Ólafsvík.

Þórir Rafn Þórisson kom Kórdrengjum yfir á 28. mínútu eftir áður en Connor Mark Simpson tvöfaldaði forystuna rétt fyrir leikhlé.

Ásgeir Frank Ásgeirsson fékk svo að líta beint rautt spjald í upphafi seinni hálfleiks, og Kórdrengir voru því manni færri stærstan hluta hálfleiksins. Það kom þó ekki að sök og þeir sigldu 2-0 sigri heim og halda því enn í vonina um að tryggja sér sæti í efstu deild á næsta tímabili.

Kórdrengir eru í þriðja sæti Lengjudeildarinnar með 31 stig eftir 17 leiki, fjórum stigum á eftir ÍBV sem hefur leikið einum leik minna. Þórsarar eru í áttunda sæti með 19 stig.

Gary Martin kom Selfyssingum í 2-0 gegn Aftureldingu með mörkum sitthvoru megin við hálfleikinn. Það seinna úr vítaspyrnu sem hann fiskaði sjálfur.

Danijel Majkic skoraði þriðja mark Selfyssinga rúmum fimm mínútum fyrir leikslok og tryggði þar með 3-0 sigur heimamanna.

Selfyssigar sitja í tíunda sæti deildarinnar með 18 stig eftir jafn marga leiki, og eru nú komnir ansi langt með að tryggja áframhaldandi veru í Lengjudeildinni að ári. Afturelding er sæti ofar með einu stigi meira.

Pétur Bjarnason skoraði bæði mörk Vestra í fyrri hálfleik þegar að botnlið Víkings frá Ólafsvík kom í heimsókn.

Vestri er í fimmta sæti deildarinnar með 28 stig, sjö stigum frá öðru sætinu sem gefur þáttökurétt í Pepsi Max deildinni að ári. Það verður þó að teljast ólíklegt að Vestra menn steli því sæti, en þó er enn möguleiki á því.




Fleiri fréttir

Sjá meira


×