Mælirinn fullur hjá eitt þúsund læknum

Læknarnir vísa allri ábyrgð á stöðu heilbrigðismála á stjórnvöld. Þeir krefjast þess að stjórnmálamenn og embættismenn á Íslandi axli loksins þá ábyrgð sem þeim ber.

Theódór Skúli Sigurðsson, Steinunn Þórðardóttir, Berglind Bergmann og Jón Magnús Kristjánsson afhentu þeim Ástu Valdimarsdóttur, ráðuneytisstjóra, og Birgi Jakobssyni, fyrrum landlækni og nú aðstoðarmanni ráðherra, undirskriftirnar við anddyri heilbrigðisráðuneytisins.

Ráðherra upptekin í öðru

Fjallað er um afhendinguna á vef Læknafélags Íslands þar sem segir að spurt hafi verið hvers vegna Svandís Svavarsdóttir heilbrigðisráðherra hafi ekki veitt undirskriftunum móttök.

 „Hún er upptekin í öðru,“ svaraði Ásta. Birgir hafi svo boðað fulltrúa læknanna á fund í kjölfar afhendingarinnar.

Læknarnir fjórir fagna samstöðu lækna og segja hana sjaldan eða aldrei hafa verið meiri en nú. Enn séu undirskriftir að berast. Þúsund undirskrifta múrinn hafi verið rofinn. Þær séu vitnisburður um erfiða stöðu í íslensku heilbrigðiskerfi.

Vona að skilaboð nái eyrum ráðherra

Eftir fund læknanna fjögurra með Birgi sagði Theódór að farið hefði verið yfir áskorunina til stjórnvalda, embættismanna og stjórnmálamanna. 

„Við vonum að skilaboðin nái til ráðherra,“ sagði hann við fjölmiðla eftir fundinn með Birgi Jakobssyni. Setja þyrfti á ferli til að bæta stöðuna í heilbrigðiskerfinu; þá sérstaklega með fókus á öldrunarmál og Landspítala.

Öldrunarmál, vandamál Landspítala, öryggismál heilbrigðisstarfsfólks og heilsugæslan, sem og samskipti sérfræðinga og lækna sem starfi utan spítalans hafi verið meðal umræðuefna á fundinum. 

„Við bjóðumst til samstarfs til að leggja okkar lóð á vogarskálarnar við að leysa úr því sem á bjátar innan kerfisins. Við vonum að boð okkar verði þegið og að haft verði við okkur samráð.“

Berglind Bergmann, varaformaður Félags almennra lækna, segir spurð að fyrirfram hefði hún ekki búist við þessum miklu undirtektum lækna. 

„En nú þegar þetta hefur raungerst kemur þetta mér alls ekki á óvart,“ segir Berglind. 

Læknar séu ósáttir við margt.

„Við erum ítrekað að upplifa að við teljum okkur hafa góðar lausnir og geta komið að borðinu og hjálpað en það er eins og enginn hlusti á okkur,“ segir hún. Þá hafi margir miklar áhyggjur af ábyrgð sinni komi upp atvik í þjónustunni nú þegar undirmönnunin, eins og á bráðamóttökunni, sé svona mikil.

„Okkur finnst við ekki geta þjónað sjúklingum okkar með þeirri getu sem við búum yfir vegna ytri aðstæðna. Við erum hugsi yfir réttarstöðu okkar og hver beri ábyrgðina þegar ytri aðstæður gera þetta að verkum. Við erum ítrekað að benda á þetta en enginn hlustar,“ sagði hún eftir fundinn með aðstoðarmanni heilbrigðisráðherra. Fara þurfi yfir málið með yfirvöldum, þar með talið landlækni, sem sé mjög vel að sér í málinu. „Ég hef fulla trú á að við getum leyst þessi mál en það þarf að fara í þau af alvöru og vinna þetta saman. Þetta er eitt af því sem við ræddum núna við Birgi og hann tók vel í það.“

Ástandið verst á bráðamóttökunni

Jón Magnús Kristjánsson, framkvæmdastjóri lækninga hjá Heilsuvernd og fyrrum yfirlæknir á bráðamóttöku Landspítala, segir að hann hafi ekki aðeins áhyggjur bráðamóttökunni heldur af stöðu Landspítala í heild. 

„Mitt hjarta tengist enn þá mest bráðamóttökunni. Ástandið þar er vont. Það er gríðarleg áhætta þegar starfsfólk er farið að segja upp og hætta. Það hefur gjarnan ruðningsáhrif og fleiri heltast úr lestinni,“ segir hann.

Theódór segist sáttur við fundinn með Birgi. 

„Ég vonast til að skrið komist á málin.“ Leysa þurfi vandann. 

„Ég vona að við hættum að setja plástra á sárin og við finnum varanlegar lausnir.“

Yfirlýsingu læknanna má sjá að neðan.