Fyrstu árin í lýtalækningum var Hannes mest í uppbyggingaraðgerðum en síðustu fimm ár hefur hann líka verið í fegrunarlækningum.

„Maður er að skapa eitthvað“ segir Hannes meðal annars um helstu kostina við starfið sitt. Hann var gestur Ingunnar Sig og Heiðar Óskar í HI beauty hlaðvarp. Viðtalið í heild sinni má heyra í spilaranum hér neðar í fréttinni.

Meira en 17 ár í háskóla

Hannes segir að starf lýtalæknis hér á landi sé fjölbreytt og skemmtilegt en háskólanámið hans tók þó meira en 17 ár.

„Fyrst þarf maður að fara í læknanám eftir menntaskóla og það er sex ár. Sjöunda árið er kandídatsár sem allir þurfa að fara í gegnum til að fá læknaleyfi. Síðan tekur við sérnámið og þá velur maður sérgrein og ég valdi lýtalækningar og þar er sérnámið svona fimm og hálft eða sex ár. Þannig að þá erum við komin upp í þrettán eða fjórtán ár og síðan fór ég áfram í doktorsnám, PhD í læknisfræði og það er fjögur ár.“

Hann segir að þetta sé samt ekki þannig að hann hafi eingöngu setið á skólabekk í allan þennan tíma.

„Strax eftir fimmta árið í læknisfræðinni er maður farinn að vinna sem læknir.“

Hannes segir að sumar flóknu aðgerðirnar sem hann hafi tekið þátt í á ferlinum hafi teygt sig upp í tólf til fjórtán tíma.

„Það getur verið erfitt, maður kannski rétt skýst út til að hella í sig kaffibolla og samloku og pissa.“

Samfélagsmiðlarnir hafa áhrif

Aðspurður um hvernig lýtalækningar hafa síðustu ár svarar Hannes:

„Helsta breytingin sem maður finnur fyrir í fegrunarlækningaheiminum er hvað sjúklingarnir eða skjólstæðingarnir sem leita til mín og okkar lýtalækna eru betur upplýstir. Það er engin spurning að samfélagsmiðlar og internetið hafa fært lýtalækningar miklu nær fólki.“

Erlendis er töluvert um að sýnt sé frá fegrunaraðgerðum á samfélagsmiðlum. Hannes segir að á Íslandi séu strangari reglur um sýningu myndbanda frá slíkum aðgerðum.

„Ísland er lítið land og það þarf kannski lítið til að fólk þekkist þó að það sé ekki verið að sýna andlit,“ útskýrir Hannes.

„Maður setur náttúrulega alltaf sjúklinginn í fyrsta sæti og hugsar fyrst og fremst um hann. Maður getur verið að setja sjúklinginn í erfiða stöðu ef maður er til dæmis farinn að biðja sjúklinginn: „Heyrðu má ég taka video og setja á Snapchat þessa aðgerð?“ Sjúklingurinn kann kannski ekki við að segja nei.“

Aukning í heimsfaraldrinum

Algengustu aðgerðirnar sem hann gerir eru brjóstastækkun, brjóstalyfting, augnlokaaðgerð og svuntuaðgerðir. Hannes segir að það hafi orðið aukning í fegrunarlýtalækningum hér á landi síðustu tólf mánuði.

„Við höfum fundið fyrir því við lýtalæknar á Íslandi. Það er kannski bara eðlileg skýring á því, fólk hefur meiri tíma, það er meira að vinna heima og hefur meiri tíma til að jafna sig.“

Hann segir að margir eigi hugsanlega líka meira á milli handanna þar sem minna er um ferðalög erlendis og annað slíkt og velji því að eyða meira í sjálfan sig.

„Það hefur verið trendið þegar það dynur eitthvað svona yfir, eins og í hruninu þá gerðist þetta líka. Fólk hægir á sér og það fer að hugsa meira inn á við.“

Þáttinn í heild sinni má finna í spilaranum hér fyrir neðan og á öllum helstu efnisveitum. Þar ræðir hann meðal annars um fylliefni, bótox, buttlift, Kendall Jenner og fleira tengt lýtaaðgerðum.