Skráðum kynferðisbrotum fjölgar

Þetta kemur fram í mánaðarskýrslu Lögreglunnar á höfuðborgarsvæðinu.

Alls bárust 226 tilkynningar um þjófnaði og 62 tilkynningar um innbrot. Þá voru skráðar 106 tilkynningar um ofbeldisbrot og er um að ræða fjölgun milli mánaða. Fimm tilvik voru skráð þar sem lögreglumaður var beittur ofbeldi.

Lögreglu bárust 30 tilkynningar um kynferðisbrot sem áttu sér stað í janúar, sem er átján prósent aukning samanborið við sama tímabil þrjú ár á undan. Þá voru 68 kynferðisbrot skráð í janúar en um er að ræða meira en 100 prósent aukningu miðað við meðaltal síðustu sex og tólf mánaða á undan.

Þess ber að geta að í janúar 2020 voru 26 kynferðisbrot tilkynnt til lögreglu, 47 árið 2019 og 32 árið 2018.

Tilkynningum um heimilisofbeldi fjölgaði einnig en þær voru 75. Þá fjölgaði einnig beiðnum um leit að börnum og ungmennum en þær voru 24 í janúar.