Innlent

Óhugnanlegt hvað árásirnar hafa vakið lítil viðbrögð

Sunna Karen Sigurþórsdóttir skrifar
Kristrún segir það hafa vakið óhug að sjá hversu litla athygli árásirnar á stjórnmálaflokkana í síðustu viku fengu. Hún segir mörk fólks hafa breyst, það gangi lengra og leyfi sér meira gagnvart stjórnmálafólki og að afleiðingarnar séu litlar sem engar. 
Kristrún segir það hafa vakið óhug að sjá hversu litla athygli árásirnar á stjórnmálaflokkana í síðustu viku fengu. Hún segir mörk fólks hafa breyst, það gangi lengra og leyfi sér meira gagnvart stjórnmálafólki og að afleiðingarnar séu litlar sem engar.  Vísir/Sigurjón

„Við tölum um íslensk stjórnmál sem ónýt og um stjórnmálamenn sem gjörspillt illmenni og þetta endar bara í ofbeldi. Það svo stutt þarna á milli. Það er ofboðslega sorglegt að við skulum vera að missa samfélagið í þessa átt. Af því að þetta var ekki svona,“ segir Kristrún Heimisdóttir lögfræðingur.

Kristrún hefur lengi starfað á sviði stjórnmála en hún skynjar breytt viðhorf almennings til stjórnmálafólks. Hún segir það hafa vakið óhug hjá sér að heyra að verið væri að skjóta á skrifstofur stjórnmálaflokkanna – og þá ekki síst hve lítil viðbrögð það vakti hjá fólki.

„Mér fannst mjög óhugnanlegt þegar þessar fréttir af skotárásum á stjórnmálaflokkana og skrifstofur þeirra heyrðust fyrir núna fyrir nokkrum dögum. Þá fannst mér óhugnanlegt hvað það vakti litla athygli. Og það sagði mér það að við á Íslandi erum búin að færa mörkin á einhvern óafsakanlega lágan stað, hvað fólk má gera við stjórnmálamenn og hvernig það má koma fram við þá.“

Það sem áður var refsivert nú orðið refsilaust

Hún telur viðhorfið hafa breyst í kjölfar mótmælanna í hruninu árið 2008. „Þar var mjög margt, sem við eðlilegar aðstæður hefði verið talið refsivert, gert refsilaust og það var líka til eitrað andrúmsloft í stjórnmálunum sjálfum. Fólk í stjórnmálum varð stundum bara fegið þegar það voru andstæðingar þess sem urðu fyrir árásunum og létu sér það í léttu rúmi liggja. En það hefði átt að skilja það að ef það er byrjað að ráðast á stjórnmálamenn þá endar það á því að allir verða fyrir því.“

Kristrún segir mikilvægt að stjórnmálafólk taki árásum alvarlega, í stað þess að reyna að þagga þær niður. Með því að gera það hafi hatrömm orðræðan fengið að stigmagnast.

Farin að venjast ljótri umræðunni

„Þessu hefur verið leyft að magnast upp. Hatursorðræða, alls konar hegðun gagnvart fólki í stjórnmálum sem allir hafa séð að hefur engar afleiðingar eða leiðir ekki til þess að samfélagið og meðborgarar taki á móti nema að mjög litlu leyti. Við erum farin að venjast því að það sé bara talað um fólk og það sé vænt um athæfi sem á sér enga stoð.“

Draga þurfi lærdóm af löndunum í kring. 

„Til dæmis á Norðurlöndunum þar sem við þekkjum pólitísk morð og hræðilega atburði. Ef við tökum því létt og sem smávægilegum hlutum að það sé verið að skjóta á skrifstofur stjórnmálaflokka á Íslandi, þar sem fólk kemur saman, vinnur sjálfboðavinnu og gerir allt mögulegt, þá erum við bara ekki að vakna til vitundar um alvarleika málsins.“

Rætt var við Kristrúnu Heimisdóttur í kvöldfréttum Stöðvar 2 í gær.


Tengdar fréttir

„Orðræðan er mjög harkaleg og oft hatursfull“

„Ég fordæmi þessa árás og finnst hún alvarleg, því þarna er verið að beita skotvopnum fyrir utan heimili stjórnmálamanns. Ég lít þetta alvarlegum augum,“ segir Katrín Jakobsdóttir forsætisráðherra um skotárás á bíl borgarstjóra um liðna helgi sem lögregla hefur til skoðunar.

Degi afar brugðið vegna skotárásarinnar

Degi B. Eggertssyni borgarstjóra er afar brugðið vegna skotárásarinnar. Lögreglan hefur vaktað hús borgarstjóra frá því málið kom upp en hún hefur fundið byssukúlur í hurð bíls hans.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×