Innlent

Senegölsku systurnar fá ríkisborgararétt

Kristín Ólafsdóttir skrifar
Regine Marthe og Elodie Marie ásamt foreldrum sínum, þeim Bassirou Ndiaye og Mahe Diouf sem hafa búið hér og starfað í næstum sjö ár.
Regine Marthe og Elodie Marie ásamt foreldrum sínum, þeim Bassirou Ndiaye og Mahe Diouf sem hafa búið hér og starfað í næstum sjö ár. Vísir/vilhelm

Allsherjar- og menntamálanefnd Alþingis hefur lagt til að senegölsku systurnar Elodie Marie og Régine Marthe Ndiaye fái ríkisborgararétt. Til stóð að vísa stúlkunum og foreldrum þeirra úr landi í haust eftir næstum sjö ára dvöl.

Mál fjölskyldunnar vakti mikla athygli fyrir áramót. Hjónin Bassirou Ndiaye og Mahe Diouf yfirgáfu heimaland sitt Senegal vegna þess að Bassirou er kristinn og Mahe er íslamstrúar. Þau báru því fyrir sig að þeim væri ekki óhætt í Senegal vegna þess.

Hjónin komu til Íslands árið 2014. Þau höfðu barist fyrir því síðan að fá dvalarleyfi hér á grundvelli mannúðarsjónarmiða og óskað eftir alþjóðlegri vernd. Báðar dætur þeirra eru fæddar hér á landi, Marie árið 2017 og Marthe árið 2014.

Í nóvember afhenti stuðningsfólk fjölskyldunnar dómsmálaráðherra undirskriftalista með 21 þúsund undirskriftum, þar sem fyrirhugaðri brottvísun fjölskyldunnar var mótmælt.

Elín Árnadóttir lögmaður fjölskyldunnar segir í samtali við Vísi að verði frumvarpið samþykkt, sem allar líkur eru á að verði gert í kvöld, fái stúlkurnar ríkisborgararétt. Það þýði að foreldrar þeirra fái dvalarleyfi á Íslandi.

Erna Reka og Damon Albarn einnig á listanum

Alls leggur nefndin til að þrjátíu umsækjendur fái ríkisborgararétt að þessu sinni. Auk senegölsku systranna er lagt til að hin þriggja ára Erna Reka fái ríkisborgararétt. Foreldrar hennar eru frá Albaníu og komu til landsins árið 2015. Þeim var vísað úr landi en komu hingað aftur skömmu síðar og sóttu í þá um dvalarleyfi. Erna fæddist á Íslandi árið 2017.

Útlendingastofnun úrskurðaði að Ernu skyldi vísað úr landi ásamt foreldrum sínum. Þau kærðu úrskurðinn en héraðsdómur vísaði kröfu þeirra frá í febrúar 2019. Þá stóð til að vísa fjölskyldunni úr landi að óbreyttu. 

Þá er lagt til að breski tónlistarmaðurinn Damon Albarn, forsprakki hljómsveitanna Blur og Gorillaz, fái íslenskan ríkisborgararétt. Albarn er sannkallaður Íslandsvinur en hann hefur dvalið langdvölum hér á landi um árabil og á hús í Grafarvogi.

Listi allsherjar- og menntamálanefndar yfir þá sem skulu öðlast ríkisborgararétt:

  1. Alexander Illarionov, f. 1984 í Rússlandi. 
  2. Aqila Amiri, f. 1985 í Afganistan.
  3. Ari Abdulla Musa, f. 1993 í Írak. 
  4. Bader Hamdan Ouda Matlaq, f. 1980 í Írak.
  5. Bergica Vicioso Encarnacion, f. 1981 í Dóminíska lýðveldinu. 
  6. Damon Albarn, f. 1968 í Bretlandi.
  7.  Ehsan Ísaksson, f. 1997 í Afganistan. 
  8. Erna Reka, f. 2017 á Íslandi.
  9. Elodie Marie Ndiaye, f. 2017 á Íslandi. 
  10. Hasan Al Haj, f. 1985 í Líbanon.
  11. Hoa Viet Nguyen, f. 1956 í Víetnam. 
  12. Irina Timchenko, f. 1984 í Rússlandi.
  13. Jericka Mandia Labitigan, f. 1995 á Filippseyjum. 
  14. Kamilla Krumina, f. 2018 á Íslandi.
  15. Karítas Emma Heiðarsdóttir, f. 2019 á Íslandi. 
  16. Magatte Gueye, f. 1979 í Senegal.
  17. María Teresa D. Cruz Hemmingsen, f. 1985 í Argentínu. 
  18. Martina Keshia Williams, f. 1990 á Jamaíku.
  19. Maryam Raisi, f. 1997 í Afganistan. 
  20. Milena Pesic, f. 1984 í Serbíu.
  21. Narueporn Huadchai, f. 2003 í Taílandi. 
  22. Othman Karoune, f. 1982 í Marokkó.
  23. Régine Marthe Ndiaye, f. 2014 á Íslandi. 
  24. Shelan Hashim Mostafa Sabsaji, f. 1974 í Írak.
  25. Sofia Krumina, f. 2016 á Íslandi. 
  26. Torpikey Farrash, f. 1955 í Afganistan.
  27. Van Nhoi Nguyen, f. 1960 í Víetnam. 
  28. Viktorija Dovydaité, f. 1987 í Litháen.
  29. Yaroslav Pavlyuk, f. 1994 í Úkraínu. 
  30. Yeneska I. Encarnacion Vicioso, f. 1999 í Dóminíska lýðveldinu.
Hælisleitendur Senegal Íslandsvinir

Tengdar fréttir

„Ég veit bara ekki hvað hún amma mín hefði sagt“

Stuðningsfólk senegölsku fjölskyldunnar, sem að óbreyttu á að vísa úr landi, afhentu dómsmálaráðherra undirskriftarlista fyrir hádegi sem tæplega tuttugu og eitt þúsund manns höfðu skrifað undir þar sem brottvísuninni er mótmælt.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið