Innlent

Yfirboðið í þriðjung dýrari eigna

Sunna Sæmundsdóttir skrifar
Sífellt fleiri dýrar eignir seljast á yfirverði.
Sífellt fleiri dýrar eignir seljast á yfirverði. Heimild/Landsbankinn

Sífellt fleiri dýrar fasteignir seljast á yfirverði og í lok árs var yfirboðið í um þriðjung allra eigna sem kostuðu yfir 75 milljónum króna. Hagfræðingur segir þetta til marks um að kreppan snerti fólk með mjög misjöfnum hætti.

Fasteignamarkaðurinn ber ýmis merki þess að vera mjög fjörugur um þessar mundir. Til að mynda var meðalsölutími á fasteignum á höfuðborgarsvæðinu sextíu dagar í upphafi síðasta árs. Undir lok ársins hafði tíminn styst um tvær vikur og fasteingir seldust þá að meðaltali á 46 dögum.

Íbúðir hafa raunar aldrei selst jafn hratt og kaupsamningum fjölgar. Síðasta ár er það umsvifamesta á fasteignamarkaði frá 2007 og Una Jónsdóttir, hagfræðingur hjá Landsbankanum, segir nokkrar vísbendingar gefa til kynna að að fasteignaverð muni hækka á næstunni.

„Til að mynda þetta hlutfall sem er að seljast yfir ásettu verði, sem hefur aukist undanfarið,“ segir Una.

Undir lok síðasta árs seldust um 22 prósent íbúða yfir ásettu verði, samanborið við átta prósent árið áður. Mest er yfirboðið í dýrari eignir. Þrjátíu prósent fasteigna sem kostuðu yfir 75 milljónir seldust yfir ásettu verði undir lok árs, en einungis ellefu prósent íbúða sem kostuðu undir 35 milljónum.

„Þessi kreppa sem við erum núna að fara í gegnum kemur svolítið misjafnlega við fólk eftir tekjuhópum,“ segir Una.

Of lítið framboð gæti verið af stærri sérbýlum eftir mikla uppbyggingu á íbúðum í fjölbýlum. Lágir vextir gera húsnæðiskaupin einnig hagstæðari en Una bendir á að sumir hafi þó líka einfaldlega meira á milli handanna en áður, meðal annars vegna samkomutakmarkana.

„Tækifæri til neyslu eru að einhverju leyti af skornum skammti. Það hefur gert það að verkum að fólk hefur haft svigrúm til að fara út í fasteignakaup og þá kannski stærri og dýrari eignir en oft áður.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.