Mikill uppgangur í hvít-rússneskum fótbolta

Íslenska U-21 landsliðið mætir því hvít-rússneska í opnunarleik Evrópumótsins í Árósum í dag. Árangur yngri landsliða, A-landsliðsins og Bate Borisov í Evrópukeppnini á undanförnum árum tala sínu máli. Íslensku strákarnir eiga erfiðan leik fyrir höndum.

U21-landslið Hvít-Rússa hafnaði í öðru sæti í sínum riðli í undankeppninni. Liðið lauk leik með jafnmörg stig og Skotland en lakara markahlutfall. Eina tap liðsins var 1-0 gegn Skotum en markið kom á þriðju mínútu í uppbótartíma. Íslenska landsliðið sló út það skoska í umspilinu eins og allir vita.

Hvít-Rússar mættu hins vegar Ítölum í umspilinu. Útlitið var svart eftir 2-0 tap í fyrri leiknum á Ítalíu. Hvít-Rússunum tókst hins vegar hið ómögulega og unnu Ítali 3-0 í síðari leiknum eftir framlengingu. Liðið gerði svo 1-1 jafntefli gegn Spánverjum í æfingaleik í vor en Spánverjar þykja líklegir til afreka á mótinu í ár.

Framherjinn Vladimir Yurchenko skoraði tvö af mörkum liðsins í sigrinum gegn Ítölum. Hvít-Rússar urðu fyrir miklu áfalli fyrir skömmu þegar Yurchenko varð fyrir því óláni að slíta krossbönd í æfingaleik. Fjarvera hans gæti reynst Hvít-Rússum dýr.

Þetta er annað skiptið í röð sem U21 lið Hvít-Rússa kemst í lokakeppni Evrópumótsins. Á mótinu fyrir tveimur árum í Svíþjóð náðu þeir aðeins í eitt stig. Þeir gerðu jafntefli við Serba en töpuðu leikjum sínum gegn Ítalíu og Svíþjóð. Þjálfari liðsins Georgi Kondratiev er þó reynslunni ríkari.

Skærasta stjarna liðsins er líklega fyrirliðinn Mikhail Sivakov sem er einn tveggja í hópnum sem spilar utan heimalandsnis. Sivakov er samningsbundinn Cagliari á Ítalíu en var á láni hjá pólsku meisturunum Wisla Kraków í vetur.

Mikill uppgangur hefur verið í knattspyrnumálum í Hvíta-Rússlandi undanfarin ár. A-landslið þjóðarinnar situr í 53. sæti heimslistans. Liðið hefur staðið sig vel í undankeppni Evrópumótsins í Póllandi og Úkraínu 2012. Það situr í 2. sæti riðils síns og hefur aðeins tapað einum leik.

Skærasta stjarna A-landsliðsins er Alexander Hleb leikmaður Barcelona.

Þá er íslenskum knattspyrnuáhugamönnum eflaust í fersku minni útreið FH gegn Bate Borisov í undankeppni Meistaradeildar Evrópu síðastliðið sumar. Bate sigraði í einvíginu samanlagt 6-1 en sex leikmenn U21 liðsins leika með liðinu. Árið 2008 urðu Valsmenn fyrir barðinu á Bate í sömu keppni.

Tímabilið 2008-2009 komst Bate í riðlakeppni Meistaradeildar Evrópu þar sem liðið gerði meðal annars tvívegis jafntefli við Juventus frá Ítalíu.

Leikur Íslands og Hvíta-Rússlands fer fram í Árósum í dag og hefst klukkan 16. Fylgst verður með gangi mála á Boltavakt Vísis.