Umfjöllun: Draumurinn breyttist í martröð

Aron Einar Gunnarsson fékk að líta rauða spjaldið þegar að Ísland tapaði fyrir Hvíta-Rússlandi, 2-0, í sínum fyrsta leik á EM U-21 liða í Danmörku.

Niðurstaðan er einkar svekkjandi þar sem að strákarnir voru mun líklegri aðilinn fyrstu 75 mínútur leiksins. En þá breyttist leikurinn.

Stanislav Dragun, sóknarmaður Hvíta-Rússlands, náði að spila sig í gegnum íslensku vörnina og var kominn í kjörstöðu þegar að Aron Einar tók hann niður í teignum. Víti var dæmt og Aron fékk að líta rauða spjaldið.

Andrei Voronkov skoraði örugglega úr vítinu og þar með var leikurinn í raun tapaður. Hvít-Rússar tóku öll völd á miðjunni og sóttu nánast linnulaust til loka leiksins. Þeir uppskáru annað mark þremur mínútum fyrir leikslok er Maksim Skavysh vippaði yfir Harald Björnsson markvörð sem var of seinn í boltann í sínu úthlaupi.

Skavysh var reyndar mjög líklega rangstæður af endursýningum í sjónvarpi að dæma.

Fram að fyrra markinu var Ísland búinn að vera sterkari aðilinn í leiknum, en strákarnir voru þó afskaplega lengi að byggja upp hættulegar sóknaraðgerðir. Fyrri hálfleikur var afskaplega daufur og hefðu Íslendingar mátt vera miklu, miklu grimmari þegar þeir sóttu fram á völlinn.

Strákarnir bættu aðeins úr þessu í seinni hálfleik og á fyrsta hálftímanum náðu þeir að skapa sér þrjú hættuleg færi - alltaf fyrir Kolbein Sigþórsson. Það fyrsta kom á 61. mínútu, er hann var sloppinn einn inn fyrir en lét verja frá sér á síðustu stundu.

Stuttu síðar átti hann skalla eftir hornspyrnu sem hæfði ekki markið og svo þremur mínútum áður en Hvít-Rússar skoruðu sitt mark fékk hann góða sendingu frá Aroni Einari, vann skallaeinvígi við varnarmann og kom sér í góða stöðu. En aftur lét hann verja frá sér.

Það er alveg ljóst að ef Ísland ætlar sér að ná einhverju úr hinum tveimur leikjunum í riðlinum verður liðið að vera mun grimmara í sínum sóknaraðgerðum. Andstæðingarnir í kvöld voru þar að auki mjög duglegir að refsa fyrir okkar fáu mistök í vörninni en því miður er ekki hægt að segja hið sama um íslenska liðið.

Leikmenn U-21 liðsins hafa margoft sýnt hversu megnugir þeir eru og þeir verða nú að finna sömu grimmdina og baráttuna sem einkenndi liðið í undankeppninni. Liðið skoraði þá 33 mörk, flest allra liðanna, og er með frábæra sóknarmenn í sínum röðum. Þeir nýttust illa í dag og það eru mistök sem mega ekki endurtaka sig.

Þrátt fyrir allt verður Aron Einar Gunnarsson að teljast besti maður íslenska liðsins. Hann spilaði glimrandi vel fyrstu 75 mínúturnar og með hann innanborðs hafði Ísland mikla yfirburði á miðjunni. Það sást best á því að sú barátta tapaðist um leið og hann fór af vellli.

Varnarmennirnir Jón Guðni og Hólmar Örn komust vel frá sínu lengst af í leiknum en voru óheppnir í mörkunum. Reyndar spiluðu flestir vel í dag en helst má setja út á þeirra leik hversu illa þeim gekk fyrir framan mark andstæðingsins.

Hvíta-Rússland - Ísland 2-0

Skot (á mark): 8-6 (5-1)

Varin skot: Gutor 1 - Haraldur 3

Horn: 2-6

Aukaspyrnur fengnar: 15-15

Rangstöður: 1-3