Mótmælt á Gasa þegar ár er liðið frá innrás Ísraela

Sérlegur talsmaður Sameinuðu þjóðanna (SÞ) um málefni hernámssvæða Ísraela í Palestínu kallar eftir því að Ísraelar láti af aðgerðum til að einangra Gasa-svæðið. Í tilkynningu fréttaveitu SÞ á Þorláksmessu er einnig kallað eftir því að lönd í Evrópu og Norður-Ameríku, sem stutt hafi Ísrael, beiti landið efnahagsþvingunum til að þrýsta á um umbætur varðandi Gasa og að unnið verði úr ábendingum Goldstone-skýrslunnar svonefndu, en þar er fjallað um mannréttindabrot Ísraela og Palestínumanna í átökum þjóðanna.

„Hver maður með samvisku, sem og stjórnvöld um heim allan og Sameinuðu þjóðirnar ættu að horfa til alvarlegs ástands á Gasa," segir í tilkynningu Richards Falk, talsmanns SÞ um hernámssvæði Palestínu, á Þorláksmessukvöld. „Áþján 1,5 milljóna íbúa Gasa sem líða fyrir vöruflutningabann Ísraela, en yfir helmingur þeirra er börn, hefur verið látin viðgangast án formlegra mótmæla stjórnvalda eða Sameinuðu þjóðanna."

Ákall Falks var sent út rétt áður en ár var liðið frá árásarhrinu Ísraela á Gasa. Íbúar á svæðinu tóku í gær þátt í skipulegum mótmælum Hamas vegna þeirra, en fleiri hundruð manns dóu og margmilljóna tjón varð í árásum sem stóðu yfir í 22 daga. Uppbyggingarstarf hefur svo setið á hakanum vegna vöruflutningabanns og einangrunar Ísraela á svæðinu. Fréttaveitan AP greinir frá því að um 3.000 stuðningsmenn Hamas hafi komið saman á torgi bæjarins Jebaliya í norðurhluta Gasa. Þar hafi verið veifað grænum fánum samtakanna og haldið uppi myndum af fjölskyldumeðlimum sem drepnir hafi verið í árásum Ísraela. Þær hófust 27. desember í fyrra, en talið er að um 1.400 Palestínumenn hafi verið drepnir í þeim. Þar af eru um 900 sagðir hafa verið óbreyttir borgarar og 400 börn. Þrettán Ísraelar voru drepnir.

Benyamin Netanyahu, forsætisráðherra Ísrael, vék ekki orði að innrásinni fyrir ári, sem gerð var undir stjórn fyrri ríkisstjórnar, í yfirlýsingu sem hann las fyrir vikulegan ríkisstjórnarfund sem fram fór í gær. Hann áréttaði þó að landið myndi bregðast við öllum árásum af fullri hörku.

Ísrael réðst inn á Gasa-svæðið fyrir ári að eigin sögn í viðleitni til að binda endi á árásir með skotflaugum á landamærabyggðir Ísraela og til að grafa undan stjórn Hamas á svæðinu.

Báðar fylkingar fagna sigri eftir átökin. Syðri byggðir Ísraela eru sagðar blómstra þar sem eldflaugaárásir hafi að mestu hætt og Hamas hampar stjórn sinni á Gasa. Svæðið er hins vegar í rúst. Mörg hundruð fjölskyldur syrgja fallna ástvini og mörg hundruð til viðbótar eru örkumla eða alvarlega særð. Þúsundir heimila voru eyðilagðar eða mikið skemmd, en stíft vöruflutningabann Ísraela og Egypta hefur hamlað uppbyggingu. Bannað er að flytja inn á Gasa gler, steypu eða annað byggingarefni.

olikr@frettabladid.is