Færeyingar monta sig af því að vera betri en Íslendingar í fótbolta

Frændur okkar Færeyingar eru í skýjunum með nýjan styrkleikalista FIFA sem birtur var í morgun. Á íþróttasíðunni sportal.fo slá Færeyingar því upp að samkvæmt listanum séu Færeyingar betri en Íslendingar í knattspyrnu.

Færeyingar eru í 114. sæti á listanum eða átta sætum ofar en Ísland sem situr í 122. sæti. 2-0 sigur Færeyinga á Eistum í undankeppni EM fyrir skemmstu varð til þess að þeir fóru upp um 22 sæti á listanum.

Í greininni er fjallað um slæmt gengi íslenska liðsins sem hefur aðeins náð í eitt stig og tapað fimm leikjum í undankeppninni. Aldrei áður hafi Ísland verið neðar á listanum.

Sjá fréttina hér.