Áframhaldandi óöld í Írak

Gjáin milli súnnía og sjía í Írak gæti breikkað enn eftir sprengjuárás við legstein föðurs Saddams Hússein í morgun. Minnst þrjátíu og tveir hafa fallið í fimm sprengjuárásum fyrir hádegið.

Sprengjan sprakk í morgunsárið við legstein föðurs Saddams Hússein í borginni Tíkrit. Þó að engum hafi orðið meint af, gæti árásin haft miklar afleiðingar, því að í augum súnníta er hún táknræn, og ljóst að atburðurinn verður ekki til að lægja öldurnar í landinu, sem hefur bókstaflega logað í óeirðum síðan í síðustu viku.

Moskan yfir legsteininum skemmdist töluvert í árásinni og ljóst er að hún mun fara illa í súnníta, sem hafa orðið fyrir barðinu á hverri árásinni á fætur annarri eftir að uppreisnarmenn úr þeirra röðum sprengdu al-Askari moskuna, einn helgasta stað Sjía í síðustu viku.

Eftir rólegan gærdag virðist ástandið aftur vera að versna í Írak. Níu sundurskotin lík fundust á víðavangi nærri borginni Bakúba í morgun. Ekki lggur fyrir hve langt er síðan fólkið var skotið, en líklega var það myrt í óöldinni í Írak í síðustu viku, þegar meira en tvö hundruð manns féllu í landinu eftir sprengjuárásina á al-Askari. Þá skemmdist önnur moska súnnía töluvert í morgun í enn einni hefndarárásinni frá uppreisnarmönnum úr röðum sjía.

Og kyrrðin í Írak í gær virðist hafa verið lognið á undan storminum, því að í morgun voru gerðar þrjár sprengjuárásir í Bagdad. Minnst þrjátíu og tveir létust og áttatíu slösuðust, þar af margir lífshættulega. Þá féllu tveir breskir hermenn þegar bílsprengja sprakk í vegkanti í suðurhluta Íraks í morgun.