Ótrúlegur leikur er Werder Bremen sló út Dortmund í vítaspyrnukeppni

Werder Bremen er komið í átta liða úrslit þýska bikarsins eftir að hafa klárað Dortmund í vítaspyrnukeppni á Westfalen-leikvanginum í kvöld.

Staðan var jöfn eftir venjulegan leiktíma, eftir framlengingu var hún 3-3 og eftir vítaspyrnukeppnina endaði leikurinn 7-5.

Gestirnir frá Brimarborg komust yfir á fimmtu mínútu. Aukaspyrna Max Kruse fór í gegnum teiginn þar sem Milot Rashica náði að ýta boltanum yfir línuna.

Rétt fyrir lok fyrri hálfleiks fengu heimamenn aukaspyrnu. Marco Reus tók aukaspyrnuna og hún var frábær. Steinlá í horninu og Jiri Pavlenka kom engum vörnum við.

Ekkert mark var skorað í síðari hálfleik en bæði lið fengu heldur betur færi. Eric Oelschlagel, markvörður Dortmund, varði frábærlega aukaspyrnu og Dortmund skallaði í slá.

Staðan var þó 1-1 eftir venjulegan leiktíma og því þurfti að framlengja. Það var Bandaríkjamaðurinn, Christian Pulisic, sem kom Dortmund yfir á fimmtándu mínútu framlengarinnar en hann kom inn á sem varamaður í leiknum.

Gestirnir voru ekki hættir því á 108. mínútu varð staðan aftur jöfn. Hinn reynslumikli Claudio Pizarro fékk sendingu inn á teiginn, tók skemmtilega við boltanum og kom boltanum framhjá Eric.

Dortmund komst aftur yfir er sjö mínútur voru eftir af leiknum. Eftir frábæran sprett Maximilian Philipp barst boltinn til Achraf Hakimi sem kom boltanum í netið en í aðdragandanum vildu gestirnir frá hendi og voru gjörsamlega æfir út í Felix Brych, dómara leiksins.

Dramatíkinni var ekki lokið. Hornspyrna Max Kruse fór beint á kollinn á framherjanum Martin Harnik sem stangaði boltann í netið. Ótrúlegur leikur og ótrúleg framlenging og staðan 3-3. Því þurfti að útkljá viðureignina í vítaspyrnukeppni.

Hetjan í vítaspyrnukeppninni var markvörður Werder, Jiri Pavlenka, en hann varði tvær fyrstu vítaspyrnur heimamanna. Werder skoraði úr öllum spyrnum sínum.

Werder Bremen er því komið áfram í átta liða úrslitin ásamt HSV og Heidenheim sem gerði sér lítið fyrir og sló út Leverkusen í dag. Bayern Munchen spilar við Herthu frá Berlín annað kvöld.

GEEEEEET IN!!! unglaublich! so stolz auf das team!!! #WERDER

— Aron Jóhannsson (@aronjo20) February 5, 2019