Enska sambandið þarf að borga laun Gerrard meðan hann er meiddur

Enska knattspyrnusambandið þarf væntanlega að borga Liverpool um 500 þúsund pund eða rúmlega 90 milljónir íslenska króna vegna meiðslanna sem Steven Gerrard varð fyrir á móti Frökkum á Wembley á miðvikudaginn.

Steven Gerrard verður frá í þrjár til fjórar vikur og enska sambandið er eitt fárra sambanda í heiminum sem borgar laun leikmanna á meðan þeir eru að ná sér góðum af meiðslum sem þeir verða fyrir í verkefnum á vegum landsliðsins.

Newcastle United, Arsenal og Tottenham Hotspur hafa öll fengið bætur vegna meiðsla þeirra Michael Owen, Theo Walcott og Jermain Defoe.

Gerarrd er með 120 þúsund pund í vikulaun og þetta er því fljótt að verða mjög stór upphæð verði hann lengi frá en það er allt sem bendir til þess að Liverpool verði án hans í allt að fjórar vikur.

Þessar bætur hjálpa þó ekki Liverpool-liðinu inn á vellinum því liðið þarf væntanlega að spila án Gerrard í leikjum á móti West Ham United, Tottenham Hotspur, Steaua Búkarest, Aston Villa og jafnvel Newcastle United.