Holle-barnamatur innkallaður

Yggdrasill hefur í samráði við Heilbrigðiseftirlit Hafnarfjarðar- og Kópavogssvæðis innkallað lífrænan barnamat vegna of mikils magns atrópíns í vörunum.

Á heimasíðu Matvælastofnunar segir að atrópín sé náttúrulegt eiturefni í jurtum sem geti valdið einkennum á borð við oföndun, ringlun og óróa.

Um er að ræða vörurnar Holle Organic Millet Porridge with rice með lotunúmerunum L14103 og L13219 og Holle Organic Millet Porridge apple-pear með lotunúmerinu L13239.

Jafnframt segir á heimasíðu Matvælastofnunar að stofnunin hafi fengið tilkynningu í gegnum evrópska hraðviðvörunarkerfið RASFF um innköllunina.

Vörurnar voru innkallaðar í Þýskalandi, Austurríki og Tékklandi þann 25. nóvember síðastliðinn. Þær upplýsingar fengust hjá heilbrigðiseftirlitinu að tilkynning hefði borist til Íslands þann 11. desember. Þá hefði strax verið farið að undirbúa innköllun varanna.