Óttast að hækkanir á stöðumælagjaldi fæli fólk frá miðborginni

„Þetta leggst mjög illa í okkur. Við óttumst að þetta fæli fólkið frá," segir Frank Michelsen, úrsmíðameistari á Laugavegi. Í næstu viku verða verulegar hækkanir á bílastæðagjöldum á þremur gjaldsvæðum í miðborg Reykjavíkur. Gjald í stöðumæli hækkar um 50 prósent.

„Það er nú þegar mjög erfitt aðgengi að Laugaveginum, til dæmis fyrir hreyfihamlaða. Með þessu er bara verið að vísa fólki frá miðborginni; Íslendingum sem koma á bílum," segir Frank.

Hann bendir á eftir að Laugaveginum hafi verið lokað fyrir umferð í sumar og með þeim breytingum komi færri Íslendingar í miðborgina. „Á móti kemur er mikið af ferðamönnum sem halda versluninni uppi en þeir munu fara. Það er alveg ljóst að það er mikil fækkun í viðskiptum af Íslendingum," segir hann.

„Þessar ákvarðanir borgaryfirvalda einkennast af því að það er farið af stað án þess að vita hvað raunverulega er verið að gera," segir hann. „Það er eins og yfirvöld vilji að miðborgin eigi bara að vera fyrir þá sem búi þar en ekki fyrir fólkið sem kemur úr úthverfunum á bílum."

Til dæmis mun gjaldsvæði 1 í miðborginni hækka úr 150 krónum í 225 krónur.