Flóðin á Indlandi taka sinn toll

Í það minnsta 239 manns hafa drukknað í flóðum á Indlandi síðustu dægrin. Rigningartíminn stendur nú sem hæst í landinu. Í gær fórust tíu manns í Uttar Pradesh-héraðinu þegar hús þeirra hrundi vegna flóðanna. Öðrum átta skolaði á brott í vatnsflaumnum. Indversk stjórnvöld telja að Nepalar hafi aukið enn á vatnselginn með því að opna gáttir stífla til að grynnka í fleytifullum uppistöðulónum. Ástandið er verst í Gujarat-héraði, þar hefur 131 dáið, 55 eru látnir í Uttar Pradesh og 23 í Madhya Pradesh.