Tvær keppnir í ár

RÚV er hætt við að hætta við Spurningakeppni fjölmiðlanna. Því verða tvær slíkar keppnir í ár. „Þetta er magnað og auðvitað eru þetta viðbrögð við keppninni okkar. Mér finnst álíka trúlegt að þau hafi ákveðið þetta með jafn skömmum fyrirvara og raun ber vitni og að allir auðmennirnir hafi ekki heyrt um eyjuna Tortola, " segir Logi Bergmann Eiðsson.

Líkt og Fréttablaðið greindi frá hætti RÚV við hina sívinsælu spurningakeppni fjölmiðlanna sem haldin hefur verið um páskana á Rás 2. Bylgjan ákvað að bregðast við fjölda áskorana, fá Loga Bergmann til að stjórna keppninni og semja spurningar og ekkert var að vanbúnaði annað en að senda boð til fjölmiðla um að senda lið til leiks. En ekki voru liðnar margar mínútur frá því að Logi birtist í viðtali við Vísir.is en dr. Sigrún Stefánsdóttir, dagskrárstjóri Ríkisútvarpsins, tilkynnti á mbl.is að Rás 2 myndi halda spurningakeppni fjölmiðlanna, reyndar ekki um páskana eins og hefð er fyrir, heldur hvítasunnuhelgina. Og að Ævar Örn Jósepsson myndi sjá um hana líkt og undanfarin ár. Hún yrði þó með breyttu sniði. Í stað engrar spurningakeppni verða því nú tvær með stuttu millibili.

Sigrún Stefánsdóttir sagðist í samtali við Fréttablaðið vonast til þess að Logi Bergmann myndi blómstra í sinni keppni. Spurningakeppni Rásar 2 yrði enda einum og hálfum mánuði seinna.

„Við erum búin að keyra þessa keppni áfram í tuttugu ár en sökum þess að Rás 2 er ekki fjársterk um þessar mundir var þetta eitt af því sem ég ákvað að skera niður," segir Sigrún. Sú ákvörðun hafi verið endurskoðuð vegna fjölda áskorana, meðal annars á Facebook. Sigrún bætir því við að Ævar Örn sé nú að vinna að tillögu um hvernig keppninni verði háttað um hvítasunnu en hún verður með breyttu sniði. Hvorki Sigrún né Logi reiknuðu með því að fréttastofurnar myndu fara í manngreinarálit heldur myndu einfaldlega mæta til leiks í báðum keppnum.

freyrgigja@frettabladid.is