Íslendingar rifja upp góðar minningar frá síðasta sumri

Víðir Reynisson, yfirlögregluþjónn hjá almannavarnadeild, skoraði á landsmenn á blaðamannafundi í gær að taka kórónulausan klukkutíma frá klukkan átta til níu í gærkvöldi og ræða um eitthvað allt annað en veiruna sem hefur tekið sig á flug um landið síðustu vikur.

„Hvað er uppáhalds minningin þín frá síðast sumri?.“

Þetta skrifar Víðir á Facebook-síðu í gærkvöld og ekki stóð á svörum hjá Íslendingum. Nokkrir þekktir Íslendingar hafa svarað færslunni.

Þórdís Kolbrún Reykfjörð Gylfadottir, ferðamála-, iðnaðar- og nýsköpunarráðherra, rifjar upp góða veðrið.

„Allir óvæntu góðviðris dagarnir sem urðu bestu dagarnir áreynslulaust. Þar sem maður bakaði pönnsur og henti út á pall og þremur klst síðar voru allir ennþá á pallinum rjóðir í kinnum að dásama íslenska sumarið að undirbúa og ræða hvað ætti eiginlega að vera í kvöldmat. Þar sem maður bara var og naut. Þessir dagar koma aftur...“

Hafliði Breiðfjörð, stofnandi og eigandi vefsíðunnar Fótbolti.net skrifar. „Besta sumarveður á ævinni sem kom akkúrat þegar ég var búinn að eignast blæjubíl.“

Íris Róbertsdóttir, bæjarstjóri í Vestmanneyjum, minnist sólarinnar og gleðinnar. „Goslokin í Eyjum. Og líka ...Sólin og gleðin sem kemur aftur! Við látum ekki ræna okkur gleðinni!“

Freyr Alexandersson, aðstoðarlandsliðsþjálfari, skrifar.

„Those summer nights. Eftir góðan sigur.“

Áslaug Arna Sigurbjörnsdóttir, dómsmálaráðherra, minnist fallegu sumardagana.

„Það er um margt að velja, ætli það séu ekki fallegu sumardagarnir þegar maður gat ferðast um landið á hestbaki með pabba og góðum vinum. Fallegi dagurinn þegar pabbi varð 60 ára. Göngur um landið og brúðkaup á Seyðisfirði. Þetta á það sameiginlegt að vera innanlands, með fólkinu sem maður elskar og í ótrúlegu veðri. Við munum öll njóta með þessum hætti aftur.“

Þórhallur Gunnarsson, framkvæmdarstjóri Miðla Sýnar, rifjar upp ferð til Svíþjóðar. „Sumardagar í Stokkhólmi með fjölskyldunni.“

Hér að neðan má sjá vel yfir fimm hundruð athugasemdir við færslu Víðis.