Sprengisandur: Ný stjórnarskrá, endurvinnsla og bandarísku kosningarnar

Rætt verður um nýja stjórnarskrá, uppbyggingu á flutningsneti fyrir raforku, endurvinnslu á plasti og bandarísku kosningarnar í þættinum Sprengisandi á Bylgjunni. Þátturinn hefst eftir fréttatíma klukkan 10:00.

Björg Thorarensen, prófessor í stjórnskipunarrétti og Ragnar Aðalsteinsson hæstaréttarlögmaður, ræða stjórnarskrármálið. Nú er búið að afhenda rúmar 43.000 undirskriftir en hvað svo? Af hverju er þetta mál orðið svona súrt eins og það byrjaði fallega?

Guðmundur Ingi Ásmundsson, forstjóri Landsnets, er svo næstur á dagskrá. Landsnet er ekki sátt við margt af því sem Bjarni Bjarnason, forstjóri OR, sagði á Sprengisandi fyrir viku, meðal annars um óhóflegar áætlanir um uppbyggingu á flutningsneti sem mætti hæglega bíða þar til skýrðist hver orkuþörfin yrði til framtíðar.

Bjartmar Oddur Þeyr Alexandersson, blaðamaður á Stundinni, kemur til mín. Hann hefur áður rakið rannsóknir sínar á stöðu Sorpu en nú er það endurvinnsla á plasti sem hann hefur sýnt fram á í langri grein í Stundinni að er langt í frá sú sem við teljum hana vera.

Kosningarnar í USA eru síðastar á dagskrá. Nicole Leigh Mosty, fyrrverandi Alþingismaður, sem er auðvitað frá Bandaríkjunum og Birna Anna Björnsdóttir, rithöfundur, fjalla um þessar mikilvægustu kosningar síðari tíma.