Lífið

Nærmynd af Hildi Guðnadóttur: Heil, hlý og litríkur sprelligosi

Stefán Árni Pálsson skrifar
Hildur Guðnadóttir hefur slegið í gegn út um allan heim undanfarna mánuði.
Hildur Guðnadóttir hefur slegið í gegn út um allan heim undanfarna mánuði.

Hildur Guðnadóttir tónskáld vann eins og allir vita Óskarsverðlaun fyrir tónlist sína í kvikmyndinni Joker í gærkvöld. Hildur er fyrsti Íslendingurinn sem vinnur Óskarinn og fjórða konan frá upphafi sem vinnur verðlaunin í flokki kvikmyndatónlistar.

En hver er þessi kona? Kjartan Atli Kjartansson ræddi við vini og vandamenn Hildar í Íslandi í dag á Stöð 2 í gærkvöldi og fengu áhorfendur að kynnast henni betur.

Hildur er Hafnfirðingur og fæddist árið 1982 og gekk í Öldutúnsskóla. Hugur hennar virðist ávallt hafa leitað í tónlist og kom hún ung fram á sjónarsviðið. Hún var í hljómsveitunum Woofer og Rúnk og kom einnig fram með Múm í kringum aldamótin.

„Hildur er afskaplega litríkur persónuleiki, rosalega glöð og ég man ekki eftir henni öðruvísi en með bros á vör,“ segir Berglind María Tómasdóttir, dósent í flutningi og miðlun samtímatónlistar, og vinkona Hildar.

Drungaleg og þung tónlist

„Hún er svaðalega mikill sprelligosi sem er svolítið fyndið þegar maður hlustar á tónlistina hennar sem er rosalega drungaleg og þung,“ segir Benni Hemm Hemm vinur Hildar og hljómsveitafélagi.

„Hún er mikil fagkona og mjög einlæg í sinni vinnu og samkvæm sjálfum sér. Hún er frábær að vinna með,“ segir Baltasar Kormákur, leikstjóri sem vann með Hildi í Ófærð og Eiðnum.

„Hildur Guðnadóttir er heil og hlý,“ segir Kíra Kíra, tónlistarkona og vinkona Hildar.

Hildur útskrifaðist fyrst allra af brautinni tónsmíðar nýmiðlar við Listaháskóla Íslands árið 2005 og hélt til Berlínar í framhaldsnám. Þar skaut hún rótum og hefur verið meira og minna síðan. Í Berlín vann hún náið með öðru tónskáldi, Jóhanni Jóhannssyni og segja má að ferill Hildar í kvikmyndatónlist sé samofinn samstarfi hennar við Jóhann sem lést árið 2018.

„Hún kom með Jóhanni inn í Ófærð eitt, þau voru þrjú saman og síðan þegar ég fer í Eiðinn hafði ég kynnst henni svolítið. Það myndast mjög gott samstarf í Eiðnum og þegar Jóhann fellur frá tekur hún við og gerir Ófærð tvö,“ segir Balti.

Mjög næm

„Það sem er sérstakt við listsköpun Hildar er að hún er rosalega næm og hlustar svo vel inn í aðstæður. Maður tekur oft ekki eftir tónlistinni, hún verður svona órjúfanlegur partur af verkinu,“ segir Berlind.

„Það er margt sem kemur saman. Bæði er hún með mjög sérstakan hljóðheim, sem er mjög skyldur hljóðheimi Jóhanns og þau uxu saman. Eftir að hann fellur frá tekur hún við sem er svolítið fallegt, þó þetta sé algjörlega hennar. Það er einhver tónn sem er frumlegur og mikið að kvikmyndatónlist í Hollywood er mjög svipuð. Hún kemur með ferskan blæ inn í verkið,“ segir Baltasar um ástæðuna á bakvið því af hverju hún vinnur Óskarinn.

„Ég veit ekki hvort það sé hægt að vinna fleiri verðlaun á einu ári en hún hefur gert. Þetta verður ekki toppað í bráð,“ segir Baltasar.

Hér að neðan má sjá nærmynd af Hildi.


Tengdar fréttir

Hildur heiðruð með kveðju á Hörpu

Hildur Guðnadóttir, tónskáld og fyrsti Óskarsverðlaunahafi Íslands, fær ljómandi hamingjuóskir frá tónlistarhúsinu Hörpu í kvöld. Til stendur að birta kveðjuna "Til hamingju Hildur!“ á glerhjúpi hússins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.