Svona var 79. upplýsingafundur almannavarna

Almannavarnadeild ríkislögreglustjóra hefur boðað til upplýsingafundar klukkan 14:00 í dag. Á fundinum verður farið yfir stöðu mála varðandi opnun landamæra og kórónuveirufaraldurinn hér á landi.

Þórólfur Guðnason, sóttvarnalæknir, Páll Þórhallsson, verkefnisstjóri í forsætisráðuneytinu og Víðir Reynisson, yfirlögregluþjónn munu svara spurningum og fara yfir stöðuna á fundinum.

Alls greindust þrjú kórónuveirusmit við landamæraskimun í gær, samkvæmt nýuppfærðum tölum á Covid.is. Virk smit á landinu eru nú níu, en voru átta í gær. Tveir hafa þá náð bata síðan í gær.

Alls hafa því 1.827 greinst með veiruna frá upphafi faraldursins, þar af fjórtán við landamæraskimun.

Rúm vika er frá því að skimun á landamærunum hófst fyrir ferðamenn innan Schengen-svæðisins. Þá er áætlað að ytri landamæri Evrópusambandsins opni þann 1. júlí næstkomandi.

Hægt verður að fylgjast með fundinum í beinni útsendingu hér á Vísi og á Stöð 2 Vísi. Þá verður bein textalýsing hér að neðan.

Uppfært: Hér að neðan má sjá upptöku af fundinum í heild sinni.