Fræg í sóttkví

Um sex hundruð manns eru nú í sóttkví hér á landi vegna kórónuveirunnar sem veldur COVID-19 sjúkdómnum. Einstaklingar sem hafa verið á ferðalagi á skilgreindum áhættusvæðum á undangengnum 14 dögum eða hafa umgengist sjúklinga með sýkinguna, þarf að setja í sóttkví.

Fram hefur komið að nokkrir þekktir einstaklingar hér á landi séu í sóttkví og má þar meðal annars nefna að Bjarni Ákason og eiginkona hans Eva Dögg Sigurgeirsdóttir hafa verið saman í sóttkví síðustu daga.

Sigurður Leifsson og Finnur Jóhannsson hafa einnig báðir verið í sóttkví með eiginkonum sínum sem hefur samt sem áður ekki stöðvað þá að komast í ketilbjöllutíma í Laugum í World Class eins og Vísir greindi frá á dögunum.

Katrín Atladóttir, borgarfulltrúi, hefur einnig þurft að vera í sóttkví í heimahúsi síðustu daga og það sama má segja um Halldór Benjamín Þorbergsson, framkvæmdastjóri SA, og Ragnar Þór Ingólfsson, formaður VR.

Liv Bergþórsdóttir, fyrrverandi stjórnarformaður WOW air og forstjóri NOVA, varð að fara í sóttkví á Tenerife ásamt fjölskyldu sinni á dögunum og síðan fór athafnarmaðurinn Magnús Scheving fór í sjálfskipaða sóttkví í sumarbústað sínum við Þingvallarvatn.

Þá er Arnar Þór Sævarsson, aðstoðarmaður félagsmálaráðherra, og knattspyrnumaðurinn Þorsteinn Már Ragnarsson, leikmaður Stjörnunnar, einnig í sóttkví þessa dagana eins og mörg hundruð Íslendingar.

Marta Nordal, leikhússtjóri Leikfélags Akureyrar, hefur verið í um tíu daga í sóttkví eftir skíðaferð.

Sigmar Vilhjálmsson, sem lengi var kenndur við Fabrikkuna en er í dag talsmaður svínabænda, eggjabænda og kjúklingabænda, er sömuleiðis í sóttkví, á þriðja degi. Hann virðist njóta lífsins eins og hægt er, tekur til hendinni í eldhúsinu og nýtur þess að vinir hans hafa fært honum bakkelsi.

Þá er söngvarinn góðkunni Eyjólfur Kristjánsson í sóttkví. Eyfi sló í gegn í Allir geta dansað á Stöð 2 í vetur og nýtir mögulega tímann til að viðhalda sporunum sem hann lærði þar.

Anna Margrét Jónsdóttir, flugfreyja og fyrrverandi Ungfrú Ísland, er í sóttkví ásamt Árna Harðarsyni eiginmanni sínum og aðstoðarforstjóra Alvogen.

Þá má nefna Bjarna Thor Kristinsson óperusöngvara sem er á þriðja degi í sóttkví.

Fréttin hefur verið uppfærð.