Drepur ekki vini sína

„Þetta er algjör óþarfi og í raun rakinn óþverraskapur að gera „mig“ að Haukamanni. Og hann viðurkennir að það var með vilja gert!“ segir Gunnar Viktorsson, sjúkraþjálfari og FH-ingur fram í fingurgóma. „Sagðist meira að segja hafa hlegið upphátt þegar hann skrifaði það!“

Ævar Örn Jósepsson sendi nýverið frá sér hinn krassandi krimma Land tækifæranna. Þar lendir persónan Árni, einn fjórmenninganna sem mynda lögguteymi í glæpasagnaseríu hans, í því að rannsaka morðmál sem tengist gömlu skólaklíkunni hans í Hafnarfirði. Ævar Örn sjálfur gekk í skóla í Hafnarfirði. Og gengst við því að á stundum er Árni málpípa höfundar. Þegar við bætist að í klíkunni úr Landi tækifæranna eru tveir sem heita Gunnar Viktorsson eða Gunni Viktors og Sigþór Jóhannesson eða Sissó, þá vekur það upp grun að þarna sé um lykilróman að ræða.

Uppgjör Ævars við sína gömlu klíku úr Hafnarfirðinum, því bæði Gunnar og Sigþór voru bekkjarfélagar hans. Og mega það heita kaldar kveðjur því persónurnar eru vafasamir pappírar svo ekki sé meira sagt. Og Árni rannsóknarlögreglumaður var þar utangátta. „Nei, ég var ekki utangátta í minni gömlu skólaklíku sem myndaðist í Lækjarskóla. Mér leið afskaplega vel þar,“ segir Ævar Örn. Og neitar að um lykilróman sé að ræða. „Ég er bara að skíra karakterana í höfuðið á góðu fólki sem ég þekki. Sem á ekkert sammerkt með þeim að öðru leyti, það er lykilatriði.

Og hef gert það í öllum öðrum bókum mínum einnig. En, já, Gunni er enn einn minna allra bestu vina, og þótt sambandið við Sissó sé kannski stopulla þá er hann einhver mesti ljúflingur sem ég þekki.“ Sá fjórði í klíkunni heitir Kristján Kristjánsson, nafn útgefanda Ævars á Skaganum og fimmti er fórnarlambið Daníel Marteinsson. „Það er út í loftið. Ég drep ekki vini mína,“ segir rithöfundurinn.

Gunnar, er byrjaður á bókinni og segir það svo sem í lagi sín vegna að nafni hans í bókinni sé vafasamur karakter en ítrekar að honum þyki sérdeilis illkvittnislegt af félaga sínum að gera nafna sinn að Haukamanni.

Sigþór, sem er lærður bakari en starfar nú hjá Lyfjaveri sem tölvumaður, segir það óneitanlega afar sérstakt að lesa bók þar sem alnafna sinn sé að finna. „Ekki bara Sigþór Jóhannesson heldur er hann kallaður Sissó!

Þetta fer ekkert á milli mála. Ég, bakaradrusla úr Hafnarfirði, orðinn lögfræðingur og skíthæll. Nei, ég er ekki ánægður með karakterinn minn. Og veit ekki hvort Ævar hugsar svona til mín? En ég er í góðum félagsskap þarna í „ríjúníoninu“ því þar eru Elsa, Sigga, Bragi, Gaui og Systa líka.“