Lánshæfi Landsvirkjunar er metið lakara en ríkisins

Lánshæfismat Landsvirkjunar var fyrir helgi lækkað af Standard & Poor‘s. Lánshæfi fyrirtækisins er því metið lakara en ríkisins. Lækkunin er ekki talin hafa áhrif á fyrirhugaðar virkjunarframkvæmdir af forsvarsmönnum fyrirtækisins.

„Það eru alltaf slæmar fréttir að fá slakari lánshæfiseinkunn þótt þetta hafi ekki bein áhrif á okkur á þessum tímapunkti. Landsvirkjun fær ekki bankalán erlendis þessa dagana frekar en nokkur annar, óháð þessari niðurstöðu,“ segir Friðrik Sophusson, forstjóri Landsvirkjunar.

Spurður hvort matið hafi áhrif á áætlanir um uppbyggingu segir Friðrik að fyrirtækið hafi svigrúm til að ákveða hvenær ráðist sé í framkvæmdir og engar skuldbindingar séu um verkefni. „En við getum borgað af okkar lánum á næstu misserum, svo staða okkar er betri en margra annarra fyrirtækja. Það skiptir mestu.“

Matsfyrirtækið Standard & Poor‘s lækkaði lánshæfismat fyrirtækisins fyrir skuldbindingar í innlendri mynt á fimmtudag. Framtíðarhorfurnar eru sagðar neikvæðar og er lækkunin sögð endurspegla „þá skoðun okkar að eigandi Landsvirkjunar, íslenska lýðveldið, hafi minni getu en áður til að veita fyrirtækinu fjárhagslegan stuðning,“ eins og segir í tilkynningu.

Lækkuð lánshæfiseinkunn Landsvirkjunar kemur einkum til vegna erfiðrar stöðu ríkissjóðs, en vegna ríkisábyrgðar breytist mat fyrirtækisins í takt við lánshæfismat íslenska ríkisins.

Stefán Pétursson, framkvæmdastjóri fjármálasviðs Landsvirkjunar, segir að lánshæfi fyrirtækisins innanlands sé nú það sama og í erlendri mynt. „Lánsfjárþörf Landsvirkjunar er að langstærstum hluta á erlendum markaði svo það er jákvætt að einkunn á erlendar skuldbindingar lækkar ekki. Ég myndi þess vegna fara varlega í að túlka það sem svo að þetta hefði veruleg áhrif á áætlanir Landsvirkjunar um uppbyggingu.“ Þessi niðurstaða S&P þýðir að lánshæfi Landsvirkjunar er lægra en ríkisins, að sögn Stefáns.

Fyrirtækið undirbýr nú fjórar virkjanir á Suðurlandi; Búðarhálsvirkjun og þrjár virkjanir í neðri hluta Þjórsár. Takist ekki að tryggja langtíma lánsfjármögnun á næstu mánuðum gætu framkvæmdir við Búðarhálsvirkjun tafist, en til stóð að hefja framkvæmdir snemma árs 2009. Kostnaður er áætlaður 25 milljarðar króna.