Elding olli rafmagnstruflunum: „Eins vel sloppið og hægt er“

Eldingu laust niður í flutningslínu Landsnets á Mosfellsheiði stuttu eftir klukkan átta í kvöld og olli það rafmagnstruflunum víðsvegar á höfuðborgarsvæðinu. Páll Pálsson, starfsmaður kerfisstjórnar Landsnets segir að vel hafi verið sloppið frá óhappinu.

„Framleiðsla í stóriðju á suðvesturhorninu fór út um skamma stund, en hinn almenni viðskiptavinur varð bara var við smá spennuflökt. Það fóru einhverjir sjónvarpsafruglarar út sem fólk varð að endursetja, en þetta veldur yfirleitt aldrei nokkrum varanlegum skaða.“

Þegar eldingunni laust niður í háspennulínuna var straumurinn sjálfkrafa tekinn af máðum megin við staðinn þar sem atvikið varð, auk þess sem fyrirfram ákveðnar stillingar ollu því að rafmagnið fór af framleiðslueiningum stóriðjuvera til þess að hægt væri að viðhalda rafstraumi til hins almenna borgara.

Páll segir að kerfið hafi virkað alveg eins og ætlast hafi verið til, og engar skemmdir hafi orðið á háspennulínunni. „Þetta er eins vel sloppið og hægt er.“