Vífilfell gaf Mæðrastyrksnefnd 2 milljónir

Forsvarsmenn drykkjarvöruframleiðandans Vífilfells afhentu í dag Mæðrastyrksnefnd í Reykjavík og fleiri góðgerðar- og líknarfélögum vörur frá fyrirtækinu að andvirði alls um 2 milljónir króna. Vífilfell hefur ákveðið að gefa viðskiptavinum fyrirtækisins engar jólagjafir í ár en gefa þess í stað vörur sem samsvara andvirði jólagjafanna til góðgerðar- og líknarfélaga. Félögin deila vörunum síðan út til skjólstæðinga sinna. Vífilfell hefur styrkt góðgerðar- og líknarfélög fyrir jólin undanfarin ár en framlagið í ár er hærra en nokkru sinni.

Meðal þeirra sem fá vörur frá Vífilfelli fyrir jólin eru Mæðrastyrksnefndir í Reykjavík og á Akranesi og Akureyri, Fjölskylduhjálp Íslands, Hjálparstarf Krossins, Velferðarsjóður Suðurnesja, Hjálpræðisherinn, Neistinn, styrktarfélag hjartveikra barna, Líknarsjóður Árbæjarkirkju og Kvenfélagið Hringurinn.

Árni Stefánsson, forstjóri Vífilfells, segir að oft hafi verið þörf á stuðningi við hjálparstofnanir en nú fyrir jólin sé það alger nauðsyn. Hvetur Vífilfell alla þá sem eru aflögufærir til að styðja við hjálparstarf en margt smátt gerir eitt stórt.