Di Canio gerir lítið úr möguleikum Englendinga

Paulo Di Canio telur að enska liðið eigi enga möguleika á Heimsmeistaramótinu sem fer fram í sumar. Di Canio telur að þreyta muni gera út um vonir liðsins.

Di Canio var rekinn frá Sunderland á tímabilinu en strangt aðhald hans féll ekki vel í kramið hjá leikmönnum liðsins. Var þeim meðal annars bannað að fá sér tómatssósu í mötuneyti liðsins.

Di Canio telur að leikmennirnir séu einfaldlega búnir á því eftir langt tímabil. Nefnir hann þess til dæmi að tankurinn hjá Wayne Rooney sé einfaldlega tómur.

„Rooney er leikmaður að mínu skapi en hann kemur í mótið með ekkert eftir á tankinum eftir langt tímabil. Hann gefur allt í alla leiki og þrátt fyrir að það sé skemmtilegt að leika leiki um jólin kemur þetta í bakið á þeim. Sérstaklega í aðstæðunum sem mótið fer fram í,“ sagði Di Canio.