Eiður Smári: Þýðir ekkert að fara heim og grenja

"Það er erfitt að segja," sagði Eiður Smári Guðjohnsen landsliðsfyrirliði þegar hann var spurður að því hvað hefði farið úrskeiðis hjá íslenska landsliðinu í 3-0 tapinu fyrir Liechtenstein í kvöld.

"Ég held að því miður höfum við bara ekki verið nógu vel skipulagðir og nýttum færin okkar ekki nógu vel. Ég sjálfur hefði átt að skora eitt eða tvö mörk og við vorum kannski dálítið slegnir út af laginu þegar þeir skoruðu. Þriðja markið hjá þeim undirstrikaði samt endanlega að þetta var ekki okkar dagur þegar maðurinn tekur boltann með vinstri og þrumar honum upp í vinkilinn," sagði Eiður í samtali við Guðmund Benediktsson á Sýn.

Guðmundur spurði Eið hvort sigur heimamanna hefði ekki geta talist sanngjarn. "Jú, það má sennilega segja það. Leikurinn hefði kannski spilast eitthvað öðruvísi ef við hefðum náð að setjá á þá mark í fyrri hálfleik, en þegar á heildina er litið má sennilega segja að þetta hafi verið verðskuldaður sigur hjá þeim - þó sé erfitt að viðurkenna það," sagði Eiður.

Hann segir þó engan uppgjafartón í íslenska liðinu fyrir lokaleikinn við Dani á útivelli. "Við verðum bara að fara til Danmerkur með það í huga að spila fyrir land og þjóð. Ég held að við þurfum bara að þjappa okkur saman, það þýðir ekkert að fara heim og grenja og við verðum að sýna hvað í okkur býr í Danmörku. Það er erfitt að finna eitthvað eitt sem var að í kvöld, því það voru margir hlutir sem voru ekki að ganga hjá okkur," sagði fyrirliðinn.