Reiðir vegna risabónusar spænska landsliðsins á HM

Margir spænskir stjórnmálamenn eru bálreiðir vegna risabónusar sem spænska landsliðið í knattspyrnu fær frá knattspyrnusambandinu takist því að vinna HM í Brasilíu.

Iker Casillas, fyrirliði Spánar, og Xavi, varafyrirliði, sömdu við Jorge Peréz, framkvæmdastjóra spænska knattspyrnusambandsins, um að hver og einn leikmaður fær 720 þúsund evrur eða 111 milljónir króna í bónusgreiðslu vinni liðið HM annað skiptið í röð.

Þetta er tvöfalt meira en brasilíska landsliðið (51 milljón króna) og þýska landsliðið (46 milljónir króna) fá takist þeim að vinna heimsmeistarakeppnina. FIFA er búið að hækka verðlaunafé sigurvegara HM upp í 27 milljónir Evra.

Þessar bónusgreiðslur gefa enga mynd af fjármálaástandinu í landinu en rétt tæpar sex milljónir íbúa Spánar eru atvinnulausir.

Meðallaunin á Spáni árið 2013 voru 252 þúsund krónur á mánuði en 302 þúsund krónur í öðrum löndum innan Evrópusambandsins.