Við erum ekki vélmenni

Barcelona missteig sig hrikalega í toppbaráttunni á Spáni í gær er liðið tapaði mjög óvænt, 2-1, gegn Deportivo la Coruna.

Barcelona vann sögulegan sigur á PSG í Meistaradeildinni í síðustu viku en liðið brotlenti í gær.

„Eftir að hafa lagt svona rosalega mikið í leikinn síðasta miðvikudag með öllu adrenalíninu og spennunni sem því fylgdi er erfiðara að koma í næsta leik,“ sagði varnarmaður Barcelona, Gerard Pique. „Við náðum aldrei að spila okkar leik og við erum ekki vélmenni.

Real Madrid er nú með tveggja stiga forskot á Barcelona og á leik inni.

„Það er erfitt að kyngja þessu tapi því við vorum á sigurbraut. Við vissum alltaf að þetta yrði erfiður leikur eftir það sem á undan er gengið,“ sagði Luis Enrique, þjálfari Barcelona.