Ungir sjálfstæðismenn mótfallnir frumvarpi Lilju og vilja RÚV af auglýsingamarkaði

Stjórn Sambands ungra sjálfstæðismanna hefur samþykkt að álykta gegn fjölmiðlafrumvarpi Lilju Alfreðsdóttur menntamálaráðherra, mæli hún fyrir frumvarpinu á Alþingi í haust. Þá skorar stjórnin á þingflokk Sjálfstæðisflokksins og aðra þingmenn að hafna frumvarpinu. Til stuðnings einkarekinna fjölmiðla leggur sambandið fram að Ríkisútvarpinu verði kippt út af auglýsingamarkaði.

Þetta kemur fram í tilkynningu sem formaður SUS, Ingvar Smári Birgisson, sendi fréttastofu rétt í þessu.

„Fjölmiðlar hafa mikilvægu hlutverki að gegna í lýðræðissamfélögum og er mikilvægi óháðra og frjálsra fjölmiðla ótvírætt. Um leið og þeir eru gerðir háðir velvild stjórnvalda og hinu opinbera eru þeir hvorki frjálsir né óháðir og ekki eins vel til þess fallnir að stuðla að opinni og upplýstri umræðu,“ segir meðal annars í tilkynningunni.

Þar er því einnig slegið föstu að frumvarpið mismuni fjölmiðlum eftir stærð ritstjórna þeirra og hafi þannig takmörkuð áhrif á rekstur stærri fjölmiðla sem halda úti öflugri ritstjórnum.

Tímabundinn stuðningur hlutfallslega lægri fyrir stærri miðla

Frumvarpið var lagt fram í maí á þessu ári. Ætlun frumvarpsins er að „styðja við útgáfu á fréttum, fréttatengdu efni og umfjöllun um samfélagsleg málefni með því að veita einkareknum fjölmiðlum stuðning í formi endurgreiðslu á hluta kostnaðar sem fellur til við að afla og miðla slíku efni.“

Endurgreiðsluhæfur kostnaður verður samkvæmt frumvarpinu bundinn við beinan launakostnað blaða-og fréttamanna, ritstjóra, aðstoðarritstjóra, myndatökumanna, ljósmyndara og prófarkalesara auk verktakagreiðslna fyrir sömu störf.

Hlutfall endurgreiðslu verður að hámarki 25% af launakostnaði en þó ekki hærri en 50 milljónir kr. til hvers umsækjanda.

Gert er ráð fyrir því að árlegur kostnaður vegna frumvarpsins verði allt að 520 milljónir. kr. frá og með 1. janúar 2020.

 

Fagna stefnu stjórnvalda en mótmæla aðferðum

Í tilkynningu SUS segir að sambandið fagni þeirri stefnu stjórnvalda lútandi að fjölmiðlum og stuðningi þeim til handa. Sambandið leggur þó til aðrar aðferðir heldur en boðaðar eru í frumvarpi menntamálaráðherra.

„Í stjórnarsáttmála ríkisstjórnarinnar kemur fram að bæta eigi starfsumhverfi fjölmiðla á kjörtímabilinu sem nú er hálfnað. SUS fagnar þessu markmiði ríkisstjórnarinnar og hvetur ríkisstjórnina til að taka á samkeppnisumhverfi fjölmiðla á Íslandi með því að draga úr starfsemi Ríkisútvarpsins og samhliða slíkum aðgerðum taka stofnunina af auglýsingamarkaði [sic],“ segir í tilkynningunni.

Sambandið hvetur stjórnvöld þá einnig til þess að „rýmka heimildir fjölmiðla til auglýsinga til að jafna stöðu íslenskra fjölmiðla gagnvart erlendum net- og samfélagsmiðlum í auglýsingasölu.“