Innlent

Svona eru veðurhorfur framundan á landinu

Kolbeinn Tumi Daðason og Margrét Helga Erlingsdóttir skrifa
Sauðárkrókur minnir á draugabæ á þessari mynd.
Sauðárkrókur minnir á draugabæ á þessari mynd. Vísir/JóiK

Birta Líf Kristinsdóttir, veðurfræðingur á Veðurstofu Íslands, segir hámarki náð hvað verður varðar ef frá er talið Suðausturland þar sem von er á miklum vindi á næstu klukkustundum.

„Það er að draga úr vindi um mest allt land. Það eru gular og appelsínugular viðvaranir í gildi um norðan- og austanvert landið. Þær eru að renna út svona klukkan níu eða tíu í kvöld,“ segir Birta Líf.

„En á suðausturlandi erum við með appelsínugula viðvörun vegna vinds sem gildir fram yfir miðnætti. Það er erfitt að eiga við það veður. Það hittir kannski ekki í alla mæla en þegar það hittir þá er það mjög öflugt.“

Von er á miklum vindum á Suðausturlandi. Jafnvel hvassari strengjum en sést hafa í óveðrinu sem nú er í gangi.

Mikil ofankoma hefur verið á Norðurlandi. Vísir/JóiK

„Við búumst við því að á næstu klukkutímum geti verið allt að 30 m/s í strengjum niður af jöklinum. Þessi viðvörun verður áfram í gildi.“

Heilt yfir sé þó að draga úr veðrinu.

„Á morgun verður má segja venjulegt norðanveður með éljum Norðan- og Austanlands,“ segir Birta.

Mikil snjókoma hefur verið á Norðurlandi.

„Það er að draga úr úrkomunni í kvöld en útlit fyrir að verði áfram éljagangur fyrir norðan næstu daga. Það er ekki alveg að stytta upp, bætist kannski frekar í en ekkert í líkingu við síðasta sólarhring.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.