Innlent

Jóhannes grunar að eitrað hafi verið fyrir sér eftir starfslokin hjá Samherja

Birgir Olgeirsson og Kristín Ólafsdóttir skrifa
Jóhannes Stefánsson í þættinum Kveiki í gærkvöldi.
Jóhannes Stefánsson í þættinum Kveiki í gærkvöldi. RÚV

Jóhannes Stefánsson, uppljóstrari og fyrrverandi stjórnandi hjá Samherja í Namibíu, grunar að eitrað hafi verið fyrir sér eftir að hann hætti störfum hjá fyrirtækinu í desember árið 2016. Þessu greinir Jóhannes frá í viðtali við sjónvarpsstöðina Al Jazeera, sem birti í dag umfangsmikla umfjöllun sína um Samherjamálið í Namibíu undir titlinum „The Anatomy of a Bribe“.

Í umfjölluninni segir að Jóhannes Stefánsson hafi ákveðið að segja upp hjá Samherja árið 2016. Samherji hefur haldið því fram að fyrirtækið hafi sagt Jóhannesi upp fyrir að misfara með fé og hegða sér með óforsvaranlegum hætti.

Jóhannes kveðst hafa ákveðið í kjölfar starfslokanna að uppljóstra um starfsemi Samherja í Namibíu og lét WikiLeaks fá þrjátíu þúsund gögn, sem hlutu nafið Fishrot Files. Gögnin varpa ljósi á það sem fram kom í umfjöllun Kveiks og Stundarinnar um Samherjamálið í byrjun nóvember; hvernig Samherji eigi að hafa beitt sér með ólöglegum og ólögmætum hætti til að sölsa undir sig gjöful fiskimið undan ströndum Namibíu.

Jóhannes lýsir því í samtali við Al Jazeera að honum hafi fljótlega orðið ljóst, og raunar verið varaður við því, að hann væri í mikilli hættu sem uppljóstrari. Stuttu eftir starfslokin hjá Samherja segir hann að heilsu hans hafi byrjað að hraka. Hann hafi fengið flog, aðsvif og óstjórnlegan skjálfta. Hann segist hafa farið til læknis í Höfðaborg í Suður-Afríku, sem hafi ekki fundið neina skýringu á einkennunum.

Hákarlarnir svokölluðu sjást hér á mynd. Frá vinstri eru Sacky Shanghala, Tamson Hatukuilipi og James Hatukuilipi. Tamson sendi Al Jazeera eiðsvarna yfirlýsingu frá vini Jóhannesar, sem sá síðarnefndi segir innihalda falskar ásakanir. Vísir/Hafsteinn

Þá hafi hann einnig farið til læknis á Íslandi og sá hafi tjáð honum að einkennin kæmu heim og saman við einkenni einstaklings sem eitrað hafi verið fyrir. Engin greining á kvillum Jóhannesar liggur þó fyrir.

Jóhannesi batnaði á endanum. Því er lýst í umfjöllun Al Jazeera að nánir vinir hans hafi fylgst „furðulostnir“ með bataferlinu – þeir hafi allt eins átt von á því að veikindin drægju hann til dauða.

„Grunsemdir Jóhannesar um að honum hafi verið eitrað hafa hreiðrað um sig í huga hans síðan hann yfirgaf Afríku í ársbyrjun 2017, en ekki hefur verið hægt að henda reiður á staðfestum sönnunum, svo ekki sé minnst á vísbendingar um sökudólgana,“ segir í umfjöllun Al Jazeera.

Eiðsvarin yfirlýsing um fíkn í eiturlyf og vændiskonur

Skömmu eftir að Al Jazeera komst í samband við Jóhannes fóru blaðamönnunum að berast upplýsingar um Jóhannes. Þar á meðal frá einum hákarlanna, Tamson 'Fitty' Hatuikulippi, tengdasyni fyrrverandi sjávarútvegsráðherra Namibíu. Sá sendi Al Jazeera eiðsvarna yfirlýsingu frá vini Jóhannesar í Höfðaborg, Christian Yema Y‘Okungo, fyrrverandi hermanni frá Kongó.

Í yfirlýsingu Christians var því haldið fram að Jóhannes ætti við áfengis- og eiturlyfjafíkn að stríða. Þá kom þar einnig fram að Jóhannes skuldaði hórmöngurum í undirheimum Höfðaborgar gríðarháar fjárhæðir vegna meintrar „fíknar“ hans í vændiskonur.

Jóhannes neitar þessum ásökunum staðfastlega. Þá er haft eftir Christian að hann hafi verið neyddur með hótunum til að til að skrifa undir yfirlýsinguna. Þar hafi enn fremur verið að finna falskar ásakanir á hendur Jóhannesi.

Vefumfjöllun Al Jazeera má nálgast hér. Í spilaranum hér að neðan má sjá umfjöllunina í heild sinni.


Tengdar fréttir

Saxast á yfirburði SWAPO í skugga Samherjamálsins

Namibíski stjórnmálaflokkurinn SWAPO, sem haldið hefur um stjórnartaumana í landinu síðan það öðlaðist sjálfstæði árið 1990, vann kosningarnar sem haldnar voru á miðvikudag í Namibíu.

Ekki bjartsýnn á að dreginn verði lærdómur

Siðfræðingur segir framgöngu Samherja í Namibíu siðferðislega ámælisverða. Segir hann óhuganlegt hversu vel þeir hafi kunnað að kaupa velvild kjörinna fulltrúa.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.