Innlent

Ragnheiður og Páll takast á um Ríkisútvarpið

Jakob Bjarnar skrifar
Páll telur að Ragnheiður eigi að víkja en hún segir dótturfélög stofnunarinnar auka umfang hennar á samkeppnismarkaði.
Páll telur að Ragnheiður eigi að víkja en hún segir dótturfélög stofnunarinnar auka umfang hennar á samkeppnismarkaði.

Ragnheiður Ríkharðsdóttir, fyrrverandi alþingismaður og stjórnarmaður í ríkisstofnuninni Ríkisútvarpið ohf., er ósátt við gagnrýni Páls Magnússonar, þingmanns Sjálfstæðisflokksins á stjórnina. Hún telur að stofnun dótturfélaga Ríkisútvarpsins hljóti að auka fyrirferð stofnunarinnar á samkeppnismarkaði.

Páll hefur gagnrýnt stjórn stofnunarinnar harðlega að undanförnu og talið vert að hún segi af sér, ef ekki að eigin frumkvæði þá væri réttast að Lilja Dögg Alfreðsdóttir menntamálaráðherra, og handhafi eina hlutabréfsins í stofnunninni, beitti sér fyrir því að svo verði.

Ragnheiður hefur tekið málið upp á Facebooksíðu sinni og ljóst að henni líkar gagnrýni Páls illa.

„Þau eru mörg íhugunarefnin þessa dagana, það er til dæmis íhugunarefni hvort það er þess virði að vera skráður félagi í pólitískum flokki.“ Augljós túlkun á þessum orðum er gremja vegna þessarar gagnrýni Páls samflokksmanns hennar og jafnvel að hún í hugi úrsögn úr flokknum undir rós vegna þess arna.

Gagnrýni Páls á stofnunina hefur einkum verið tvíþætt. Hann hefur gagnrýnt það að stjórn vilji pukrast með umsækjendur um stöðu útvarpsstjóra. Í gær sendi úrskurðarnefnd upplýsingamála frá sér þá úrskurð vegna kæru að stjórninni væri þetta heimilt, þó tekið sé fram að ekkert sé að því að hún birti þessar upplýsingar. Þá vísar Páll til niðurstöðu stjórnsýsluúttektar Ríkisendurskoðunar sem segir Ríkisútvarpið ohf. hafa brotið lög nú um lengri tíma með því að stofna ekki dótturfélög um samkeppnisrekstur sinn eins og skýrt er kveðið á um í lögum.

Páll harður á að stjórn beri að víkja

Ragnheiður vísar til ræðu Páls þar um á þinginu í vikunni.

„Þessi umræða þingmannsins er í það minnsta frekar döpur og að hann sem formaður Allsherjarnefndar opinberi með þessum hætti vankunnáttu sína er kannski spurning um hæfi þingmannsins.

Stjórn Ríkisútvarpsins fær umboð sitt frá Alþingi, því er það svo að aðeins Alþingi getur afturkallað þetta umboð, svo einfalt er það háttvirtur þingmaður.“

Það gustar um Ríkisútvarpið þessi dægrin. Vísir/Vilhelm

Páll svara Ragnheiði á hennar vettvangi og segist gera sér fulla grein fyrir því að undanfari þess að kjósa stjórnarmenn á hluthafafundi er kosning þeirra á Alþingi. „Það þarf ekkert að deila um formið á því, en eðlilegt að beina því til menntamálaráðherra að taka frumkvæði í málinu ef stjórnin gerir það ekki sjálf.“

Efnisatriði máls, að sögn Páls, eru hins vegar þau að stjórn beri ábyrgð á rekstri Ríkisútvarpsins og að farið sé að lögum um stofnunina. hann segir þar um ótvíræða lagaskyldu að ræða sem brotin hafi verið nú um tveggja ára skeið.

„Þess vegna tel ég að stjórnin eigi að víkja. Stórundarlegar yfirlýsingar stjórnar RÚV í kjölfar skýrslu Ríkisendurskoðanda - og allur vandræðagangurinn og augljós vanhæfnin í kringum ráðningu á nýjum útvarpsstjóra - hafa orðið til þess að styrkja mig enn frekar í þeirri skoðun.“

Segir dótturfélög auka fyrirferð á samkeppnismarkaði

Ragnheiður svarar Páli og segist deila skoðunum hans að ekki sé valkvætt að fara að lögum. Hún segir það koma sér á óvart að Páll, sem fyrrverandi útvarpsstjóra og núverandi þingmanni Sjálfstæðisflokksins skuli nú svo umhugað um lög, því að í hans tíð sem útvarpsstjóra var ekki að finna aðgreiningu almannaþjónustu og samkeppnisrekstrar í ársreikningum RUV sem bar að gera, nokkuð sem Ragnheiður segir í skýrslu Ríkisendurskoðanda. Hún segir stjórnina hafa unnið í nánu samstarfi og notið ráðuneytisins í því að stofna dótturfyrirtæki um samkeppnisrekstur.

„Það kemur mér hins vegar mjög á óvart að þingmenn Sjálfstæðisflokksins skuli halda á lofti stofnun dótturfyrirtækja RUV því slíkt getur haft í för með sér útþenslu RUV í samkeppnisrekstri og væri nær að ganga að „fílnum í stofunni“ sem er vera Ríkisútvarpsins á auglýsingamarkaði.“


Tengdar fréttir

Aldrei nein óvissa með dótturfélag RÚV

Ríkisendurskoðandi segir að sú lagaskylda hafi hvílt á Ríkisútvarpinu að stofna sérstakt dótturfélag um samkeppnisrekstur. Um það hafi ekki verið nein óvissa. Stofnunin hafi því brotið lög frá því í byrjun síðasta árs með því að uppfylla ekki þessa skyldu sína.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.