Innlent

Tvær krappar og djúpar lægðir á sveimi suð­vestur af landinu

Atli Ísleifsson skrifar

Tvær krappar og nokkuð djúpar lægðir eru á sveimi djúpt suðvestur í hafi, en þeim fylgir sameiginlegt úrkomusvæði sem nálgast suðurströndina. Gul viðvörun tekur gildi á Suðurlandi á hádegi og suðaustanlands síðdegis. Er þar spáð vindi, 20 til 25 metrum á sekúndu.

Þetta kemur fram hugleiðingum veðurfræðings á vef Veðurstofunnar. Samfara lægðunum fer austanvindur vaxandi í dag og verður að stormi eða roki undir Eyjafjöllum, við Reynisfjall og Öræfajökul síðdegis.

„Jafnframt þykknar upp víða á landinu og snjóar sums staðar sunnanlands seinni partinn. Í kvöld hvessir einnig úr norðaustri á Vestfjörðum með éljagangi og hríðarveðri á þeim slóðum fram eftir nóttu. Svalt loft umlykur landið og því víða talsvert frost.

Á morgun eru lægðirnar komnar langt austur í haf og vindur orðinn norðanstæðari. Gengur á með éljum víða um land, en léttir til fyrir sunnan og vestan og hlýnar heldur. Lægir síðan um kvöldið og dregur úr éljum,“ segir í hugleiðingum veðurfræðings.

Veðurhorfur á landinu næstu daga

Á sunnudag: Norðaustan 13-20 m/s í fyrstu með snjókomu eða éljum N- og A-lands og hita kringum frostmark. Lægir síðan smám saman og léttir til, en áfram dálítil él á N- og A-landi og kólnar í veðri.

Á mánudag: Gengur í suðaustan 13-18 m/s með snjókomu, en slyddu eða rigningu við S-ströndina síðdegis. Hægari NA-lands framan af degi, en hvessir seinni partinn og fer að snjóa. Hiti að 5 stigum syðst á landinu, annars 0 til 10 stiga frost, kaldast á NA-landi.

Á þriðjudag: Útlit fyrir að gangi í norðan- og norðaustanstórhríð á N-verðu landinu, en hægari vindar og él syðra. Hiti kringum frostmark.

Á miðvikudag og fimmtudag: Lítur út fyrir ákveðna norðanátt með snjókomu eða éljagangi, en bjartviðri sunnan heiða og kólnandi veður.

Á föstudag: Líklega austan- og norðaustanáttir með snjókomu eða éljum í flestum landshlutum og kalt veður.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.